Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Dit is die wise van Ick had een ghestadich minneken 1.
Ick weet een suuerlike
Gheen schoonder niet en leeft
Sy woont in hemelrike
In weelden dat sy leeft
Wie dat haer liefde heeft
En dienen haer met trouwen
Die schoonste bouen alle vrouwen
Die haer dienaren niet en begheeft
2.
Twee vriendelike oochskens draecht si
In alle haers dienaers noot
Daer mede so veriaecht si
Och allen tegenspoet
Och edel maghet soet
Wilt doch mijnder ontfermen
Als ick sal moeten steruen
Troost mi in alder noot. ||
| |
[pagina 120]
| |
3.
Ick en conde niet vergheten
Haer grote ootmoedicheyt
Ten waer niet wt te spreken
Haer suyuer reynicheyt.
En ick weet wel hoe si heyt
Die mijn hertken heeft béuangen
Na haer staet al mijn verlangen
Tot inder eewicheyt
4.
Wt Dauids geslachte geboren
Vander eewicheyt voersien
Wt alle maechdekens vercoren
Wat lof/ wat eer mocht ic haer bien
O Maria maget puere
Propheten van goeden leuen
Die hebben van v ghescreuen
So menighe schoon figuere.
5.
Och gloeyende Moyses doren
Die brant/ ende niet en verbrant
Schoon roose sonder doren
Al in dat coren gheplant
Weest doch mijn onderstant
Ende wilt voer mi spreken
Als mi mijn herte sal breken
V dienaer wil ick sijn
6.
O alder schoonste duyue
Noyt wijn soe soet men vant
Reyn tacken van olyuen
O duyue die v ghewan
Die wter arcken quam
Prijs hebt ghi ons verworuen
Hi is voer ons ghestoruen
Die ons dit leuen gan
7.
Schoon bloeyende Aarons roede
Reyn maechdelike greyn
Fonteyne der minnen vloede
Al in des hemels pleyn
Rust ghi altijt certeyn
So wilt toch voer mi spreken
Als mi mijn herte sal breken
V dienaer wil ick sijn.
8.
Reyn balsem gaerde gepresen
Ghi riect als nardus soet
Want ghi cont ghenesen
Des sondaers wonden groot
Al waren sij totter doot
Als hi die sonden wil laten
Soet bouen honich raten
Sijt ghi des sondaers troost.
9.
O suyuer lelie reyne
Noyt sinette in v en quam
Een herte sach v alleyne
Seer wilt dat tot v quam
Het is gheworden tam
Het liet sijn iaghers driuen
Het woude bi v bliuen
Wel neghen maenden lanck.
10.
O Sara schoonste vrouwe
Wiens ghelijc men noyt en vant
Ick bid v op rechter trouwe
Als ick moet int vreemde lant. ||
Daer ic ben onbekant
Wilt doch mijn leytster wesen
Soe sal icx al ghenesen
Wat mi daer coemt ter hant
11.
O Gedeons vlies bedouwet
Met hemelscen dau bespreet
O alder claerste vrouwe
Ghi verwint den viant wreet.
Verdrijft toch alle mijn leet
Ende wilt se bi v bringhen
Alle die dit liedeken singhen
Want God v gaerne verhoort
|
|