Een devoot ende profitelyck boecxken

[p. 121]

⁺

+ Fo. lvi.^v-Fo. lvij.^r H i

N^o. XCIV.aant.

ℂ Op die selue wise.

1.
MAria suyuer kerssouwe
Moeder ende maghet fijn
O alder ghenadichste vrouwe
Der sondaren medecijn
Bedwingt dat helsche swijn
Aen v staet al mijn betrouwe
Wacht mi vanden eewigen rouwe
Ende v dienaer sal ic sijn
2.
Bi Iesum sidy verheuen
Aldoer v gratie soet
V ghenade is onbescreuen
Die ghi den sondaers doet
Verwerst nu metter spoet
Dat mijn sonden mi worden vergenen
Hier na dat eewich leuen
Der sielen dat eewich goet
3.
Ick ben een vat vol sonden
Van sonden ben ick onreyn
Gheen sondiger en was oyt vonden
Dat ken ic voer v certeyn
Dyes alder weertste greyn
Doer v kints bloedige wonden
Verwerft mi tot allen stonden
Ghenade int shemels pleyn.
4.
Te laet yst dat ick bekinne
Mijn sonden ende al mijn quaet
Als ic mijn boosheyt versinne.
Mijn herte wort desperaet
Dus voer mijn swaer misdaet
O hemelsche keyserinne
Al doer v vierighe minne
Aen Iesum voer mi gaet.
5.
Princesse roose sonder doren
Mijn sonden sijn mi seer leet
Aen God sidy vercoren
Ic stincke doer mijn sondich sweet
Maria doer v liefde heet
En laet mi niet verloren
Noch in mijn sonden versmoren
V te dienen ben ick bereet.