Een devoot ende profitelyck boecxken

N^o. LXXXVIII.aant.

ℂ Op die selue wise/ oft op Wat gaf hi haer te loone

1.
WAt sal ic nu beghinnen
Waer sal ic gaen om raet.
Ick sie dat alle mijn sinnen
Dolen al meest int quaet
Eylaes wat is mijn leuen?
Hoe snoode is minen staet
Al vinde ick mi buten screuen
In also menighe misdaet
Schoon aenschijn claer
O reynste maghet eerbaer
O vrouwe vry
Thoont v ghenade aen mi
2.
Den heere die mi maecte
En heb ick niet bekent
Noch dliden dat hi smaecte
O wach mi mensche blent
Dat ick hier alle mijn iaren
Den edelen tijt present
Dus ydelijck laet varen
Dit maect mi swaer torment
Schoon aenschijn claer. & cete.
3.
Al dat ick hier ontfanglie
Heb ick seer qualijck verdaen
Mi naect Gods ordeel strange
Och wat sal ick aen gaen
Ick ben al vol misdaden
Waer sal ick troost ontfaen
O moeder vol ghenaden
Wilt mi doch nu bi staen.
Schoon aenscijn claer. &cet.
4.
O alder hoochste vrouwe
Mijn sonden sijn soe groot
Dies legghe ic nu met rouwe
Mijn hooft in uwen schoot
O weerdighe aduocate
O schoonste roose root
Thoont nu v charitate
Aen mi in deser noot
Schoon aenscijn claer. &cete.
5.
Verdient heb ic veel plaghen
O hoochste vrouwe vry
Wien sal ic mijn liden claghen
O moeder/ anders dan dy
Ghi sijt ons troosterinne
Ghi staet doch elcken bi
Doer v moederlike minne
Maket dat ick salich si.
Schoon aenschijn claer. &ce.
6.
O moeder bidt den heere
Die in uwen lichaem lach
Dat ick mi na sijn leere
Voort aen bat stichten mach. ||
En lost mi vanden sonden
O schoonste ooghen opslach
So dat ick tot allen stonden
V lief kint dienen mach

[p. 115]

 

⁺

 

Schoon aenschijn claer. &ce.

 

7.

 

Al ben ick nu mistoerden

 

In quaet meer dan ick weet

 

Met wercken oft met woerden

 

O moeder het is mi leet

 

Bidt God om mijn ghenesen

 

Maect mi ter duecht bereet

 

Ick wil sijn dienaer wesen

 

Voort aen in minnen heet.

 

Schoon aenschijn claer. &cet.

 

8.

 

O weerde Gods princesse

 

Die onse moeder sijt

 

Helpt mi dat ick Gods lesse

 

Volbrenghe in alder tijt

 

Verlicht mi arme blinde

 

Want ghi die arme bevrijt

 

Ende weest mijn troost int ynde

 

In minen laetsten strijt

 

Schoon aenschijn claer

 

O reynste maghet eerbaer

 

O vrouwe vry

 

Thoont v ghenade aen mi.

+ Fo. liij.^v-Fo. liiij.^r