Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 112]
| |
No. LXXXVII.aant. | |
ℂ Dit is die wise van Hier comen drie licht gheladen/ of het gaet op O mey God danck. 1.
O fluer van allen vrouwen
Maria reyn beelde soet
Als ick v mach aenschouwen
Verhoecht mi minen moet.
Ghi || sijt diet al verbliden doet.
Daer bouen in des hemels lant
V gracie vloeyt als een volle vloet
Op ons arme menschen cranck.
Schoon aenschijn blanck
Lof ende danck
Al ben ick cranck
Ghi sijt ons troost verheuen
Al in des hemels sanck.
2.
O hoochste coninghinne
Van God altijt ghemint
Ick ben bedruct van sinne
Mijn leuen en is maer een wint
Vercrijcht mi gracie aen v kint
| |
[pagina 113]
| |
Te gaen den rechten ganck
Eer my die bitter doot mijn leuen beneemt.
Neemt mi hier in v bedwanck.
Schoon aenschijn blanck
Al ben ick cranck.
Ghi sijt ons troost verheuen
In des hemels sanck.
3.
O bloeme alder hoochst ghepresen
Voer al dat God gheboot
Bi v sijn wij ghenesen
O troost in alder noot
Ghi en hadt noyt smette/ cleyn noch groot. ||
Int baren noch int ontsanck
V siele/ v lijf/ wert na v doot
Verheuen in des hemels sanc.
Schoon aenscijn blanck. & cetera.
4.
Fonteyne vol van duechden
Met engelen al omrinct
Doer tgroot solaes van vruechden
Als ghi den Gods sone ontfinct
Ick bid v dat ghi den vyant dwinct
Int vechten valt hi ons so strange
Eer hi mijn siele tonder brinct
Coemt mi te hulpen ic ben so cranc
Schoon aenscijn blanc. &cet.
5.
Doert minnelijc visiteren
Van uwer nichten weert
Wilt mi nu preserneren
Van dat mijnder sielen deert
Ic heb mi seer qualijc gheneert
Tot Gode ben ic veel belanck
V kint gheeft al dat ghi begeert
Vercrijcht mi sinen danck
Schoon aenscijn blanc. &cet.
6.
Al vander hellen soorte
Gods moeder en maecht eerbaer
Doer die vruechde dijns kints gheboorte
Vertroost mijn herte swaer.
Mijn hope staet aen v eenpaer
Al ben ic in duechden cranck
Bescermt mi vander hellen vaer
Och eewelijc is so lanck
Schoon aenscijn blanck. &cc.
7.
O moeder die God meest minde
Maria fijn vrouwelic diet
Doer die vruecht van uwen kinde
Doert liden dat hem gheschiet
Sijn bitter doot ende v verdriet
Behoet ons vander hellen slanc
Doer de vruecht daer ghi hem nu in siet
Neemt mi in v bedwanck
Schoon aenscijn blanck. &cet.
8.
O maecht niet om volprisen
In duechden heel verclaert
Doer die vruecht van dijns kints verrisen
Sijn opuaert ten hemel waert
Doer den heiligen geest- vermaert
Die God sinen apostolen sant
Ick bid v dat ghi mi bewaert
In mijnder sielen wtganck
Schoon aenscijn blanck. &c.
9.
O alder schoonste schoone
Wiens vruecht is onghesomt
Ghi sijt int shemels throone
Daer ghi bouen die sterren clomt
Als v kint de quade verdoemt
Ghedenct dan desen sanck
So dat ic hooren mach/ nu comt ||
| |
[pagina 114]
| |
Segt mijnder moeder danck
Schoon aenscijn blanck
Lof ende danck
Al ben ick cranck
Ghi sijt onsen troost verheuen
In des hemels sanck
|