Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
AEnhoort doch mijn gheclach
Ghi coninc der hemelen binnen
Ick truer nacht ende dach
Om die sonden daer ic in lach
| |
[pagina 110]
| |
Dwelc ick wel beclagen mach
Ick bid v om een verdrach
Ghi heer der Seraphinnen. ||
2.
Beroert is alle mijn bloet
Want ic mijn sonden niet en kinne
In Iesus wonden soet
Beueel ick mi metter spoet
V gracie mi ontdoet
Neemt mi in v behoet
O heere der Cherubinnen
3.
Nu hoort doch al hier naer
Wij sondaren int ghemeene
Hoe dat met tranen claer
Wiesch Iesus voeten voerwaer
En droochdese met haren hayr
Een sondersse openbaer
Maria magdaleene.
4.
Waer om si heeft ontsaen
Quitinge van haerder pene
Ende oock der sonden saen
Die si oyt hadde misdaen
Och noyt so bliden vermaen
Hier om so roep ick aen
Maria magdalene.
5.
Van sonden ben ick belast
Van binnen ben ick onreene
Mijn crancheyt dagelijcx wast
Die vyant mi gaerne verrast
Hi doet mi groot ouerlast
Wilt mi vercrigen rast
O weerdige Magdaleene.
6.
Wilt mi vercrighen dach
Dat ick mijn sonden beweene
Ghi sijt diet wel vermach
Die voer Iesus voeten lach
Met soeten ooghen opslach
Hem eerst verresen sach
O schoone Magdaleene
7.
Ghi sijt mijn aduocaet
In mijn herte sidy de ghene
Die mi mach gheuen raet
Al teghen die sonden quaet
En des helschen viants raet
Princersse mijn toeuerlaet
Sijt ghi vierige Magdalene
|
|