Een devoot ende profitelyck boecxken

N^o. LXXXIV.

ℂ Op die selue wise

1.
REyn maechdelijc aenscijn
Ghi hemelsce coninghinne
Ghi staet int herte mijn
Altijt sonder eenich termijn
V eygen wil ick sijn
Bedwingt dat herte mijn
En schenct mi doch v minne
2.
O vruchtbaer honich soet
Der maechden keyserinne
Neemt mi in v behoet
Al in des werelts vloet
In minen teghenspoet
Maect mi der dinghen vroet
En schenct mi doch v minne
3.
In v rust mijn verlaet
O wijste vrou van sinne
Daer alle mijn hoep aen staet
O schoonste dagheraet
Weest doch mijn aduocaet
Al in des hoochsten raet
Ende schenet mi doch v minne.
4.
Schoon bloemken excellent
Wiens duecht ic seer beminne
O edelste Maria yent
Int liefste parlement
Als ick sal sijn present
Solueert mijn argument.
En schenct doch mi v minne
5.
Maria roose root
Helpt mi ten hemel binnen
Maect mi van sonden bloot
Helpt mi in alder noot
Wacht mi voer svyants stoot
Och coemt doch in mijn doot
Ende schenct mi doch v minne
6.
Die dit lieken heeft gemaect
Eerstmael int beghinne
Is in die cap gheraect
Ende heeft die werelt versaect
Van eenen predikaer ontscaect
Princersse doch op mi waect
Ende schenct mi doch v minne