Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise || oft op Ghi ruyters ghesellen.1.
LAet ons altijt den sin verlichten
Inder scrifturen troost vervruecht
Die liefde Gods int herte stichten
Waer wt can comen alle duecht
Want als wij mercken hoe by sonden
Wi so van God waren vervreemt
Tot groten troost is ons beuonden
Dat wij tot hem dus sijn gheteemt
2.
Dat ioetsche volc / bi Gods verkiesen
Heeft eerstmael die scrifture ontsaen
Maer het heeftse worden te verliesen
Doer menschen inset oft bestaen
Het heeft vermenicht Gods gheboden
Ende anghebeden dwerc van sijnre hant
Dit is die meeste val der ioden
Gods woert versmaet menschen bestant
3.
Die ioden waren tvolc vercoren
Inden olijfboom wel versaemt
Sij hebben haer recht verloren
Waer wt si mogen sijn bescaemt
Wij waren die olijfboom tacken
Die inden wilden woude stont
Tbeliefde god ons op te packen
Om te planten in sinen gront
4.
Wij waren albeulect mit sonden
Doer Adam die hem viel rebel
God heefter tegen boete vonden
Daer bi tvechten is worden spel
| |
[pagina 90]
| |
Hi heeft hier neder laten dalen
Den Messias lange beloeft
Ende die scult hem laten betalen
Van dyen die in sijn woert gheloeft
5.
Het ionstich verkiesen van onsen heere
Heeft ons totten gelooue brocht
Waer bi dat wi tot sijnre eere
Tot sijnder liefden sijn gherocht
Waer wt wi alle saken liden
Verduldelijc sonder verdriet
In tegenspoet wi ons verbliden
Versekert dat ons God aensiet.
6.
Want wij doer dwoert / als doer den speghel
Den schat van sinen gheeste ontfaen
Cristus bloet dat is den seghel
Die gheest moet tot ghetuyge staen
Dien ontfanghen wij tot eenen pande
Die ons den pays int herte ghiet
Gheen vyant / gheen sonde / noch scande
En brenghen ons onruste noch verdriet
7.
Het wtwendich teeken van tdoopsel
Gheeft ons van desen claer bediet
Tgelooue / die gheest van binnen / knoopsel ||
Doer dwoert dat ons hier Christus liet
De gheest die coemt ons hier versamen
Ghemeen met Christo onbeschaemt
Waer bi dat wij ons niet en scamen
Sijn erfghenamen te sijn ghenaemt.
8.
Wij sijn die bruyt / ende onse heere
Die is die bruydegom verciert
Sijn weldaden gheeft hi tonser eeren
Onse sonden hy tot hemwaerts stiert
Sijn goet dat coemt van sinen vader
Gheeft hi ghemeen tot onsen profijt
Wat onse is neemt hi algader
Gheen sonde en coemt ons tot verwijt
9.
Wij sijn sijn broeders altemale
Kinderen van God met hem ghenaemt
Dit weten wij al biden strale
Den gheest die ons maect onbeschaemt
Hi is dat hooft / wi sijn die leden
Van een gheestelijc lichaem sijn
Die vader moet bi allen reden
Dat hooft van Cristo selue sijn.
10.
Wij moeten hem gaen doen offerande
Alsoot int doopsel staet vertoocht
Ende versmooren alderhande
Strale des vleeschs die niet en dooch
Spijt / nijt / houerdie / idel reden
Ende des vleeschs alle wellust
Moeten hier al sijn ondertreden.
Die gheest brengt al dat vlees in rust.
11.
Na dit steruen coemt dat verrisen
Als Cristus verrees na de doot
Die wet doet alle menschen afgrisen
Belofte brengt ons wter noot
Want als hi ons dus wort te nopen
Coemt / ick heb al voer v voldaen
Dan comen wij na hem ghelopen
En voer sijn gherechte staen
12.
Dan moeten wi den heere louen
Want al dese gauen hi ons geest
Wat wi hebben dat coemt van bouen
Daer onse salicheyt aen cleest
Wij sijn hem sculdich alle ons wercken
Die wij in hem connen bestaen
Willen wij die scriftuere aenmercken
Hi heeft self al voer ons voldaen
13.
Mer dit moeten wi al bekennen
Ouer die kerstenen al ghemeen
| |
[pagina 91]
| |
Vliegende snellijc als met pennen ||
Tot haren orbaer al ouer een
Makende henlieden ghemeene
Cracht / wijsheyt / sinnen / en scat
Sonder van hem te willen scheen.
Dit leert dat woert Cristi plat
14.
Wi moeten al ons costen winnen
Int sweet van onse aenscijn claer
Met handen / voeten / ende sinnen.
Dit toont de scrifture openbaer
Die ghenoech hebben bi te leuen
Wercken voer die / dies hebben noot
Hier in en mach ooc nyemant sneuen
Voer al die werelt is Christus doot.
15.
Wij moeten al wt charitaten
Malcanders last blide ondergaen
Die liefde van mtalcander vaten.
Ghewillich mit malcander staen
Den crancken sondare verdragen
Rechtende snel elck anders verdriet
Dus sullen wij Gode behagen
Salich is hi die Goods woert aensiet.
16.
Want sonder dat aensien van den woerde
Ende dat nyeuwe testament.
Ons sinnen staen altijt int noerde
Ende totten vleesce ghewent
Maer int licht vander scrifture
Wort alle duysternisse claer
Die daer in soect sijn auontuere
Sijn leuen wert hem openbaer
17.
Hi sal daer doer comen te weghe
Die alle vleesch is onbekent
Elck man dit woert wel neerstich weghe
Dat hi mach leuen onbeschent
Tis al te cranck dat wi versieren
Met God te worden versaemt
Sonder die scrifture te hantieren
Diese versmaet die wort eens beschaemt.
18.
Onse ouders diese niet en wisten
Bi onbequaemheyt vander tijt
En sochten met alle listen
Gods eere / ende haerder sielen profijt
Die mogen bi eenige reden
Hier in wesen gheexcuseert
Nu en mach niemant sijn te vreden
Die sinnen heeft hi en studeert.
19.
Och troostich woert / o vierich leuen
O crachtich brant o vierich aensien
Ghi moget den strael van minnen gheuen
In liefden ontsteken ons ingien
Wildy in ons vierichlijc wercken
Als in die menige is ghedaen
So worden wi de rechte clercken
Die tot uwen dienste sullen staen ||
20.
Och kersten met soe dierbaren ware
Wt ws vyants slot ghecocht
Aenmerct dat woert / this die nyeu mare
Doer welcke ghi sijt wt gherocht
Ondersoect dat mit soeten gheeste
So moechdy vri comen als vrient
Seer blidelijc ter auont feeste
Daer dwoert selue ter maeltijt dient.
|