Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 92]
| |
ℂ Dit is die wise Ick seg adieu 1.
O doot o doot / v macht gaet bouen screnen
V cracht is groot / die v God heeft ghegheuen
Ghi nemet al in v ghewout
Hoe rijc / hoe sterck / hoe vroom / hoe stout /
Hoe ionck / hoe out / hoe ionc / hoe out /
Ghi benemet haer allen dleuen
Ghi benemet haer allen dleuen.
2.
Hout op in tijts
Eer v die doot verslinde
Bidt waer ghi sijt
Dat v God gratie sinde
Ghebruyct toch wijsheyt en verstant
En wacht v voer den helschen brant ||
Ick rade v dat / ick rade v dat
Daer is pijn sonder eynde
Daer is pijn sonder eynde
3.
Allendich man
Wat sal ick nu gaen maken
Die niet en can
| |
[pagina 93]
| |
Tot eenige duechden gheraken
De werelt heeft mi so vast gheuaen
Al wilde ick / ick en cans haer nyet ontgaen
Wat sal ic bestaen / wat sal ic bestaen
Als ic die doot sal smaken
Als ick die doot sal smaken
4.
Niemant en weet
Wanneer die doot sal comen
Maect v ghereet
Het sal v namaels vromen
Ende schout die valsce werelt wreet
Die naer ons verdoemenisse steet
Altijt bereet / altijt bereet.
So waer haer cracht benomen
So waer haer cracht benomen
5.
Rijck God wanneer
Sal ick die sonden laten
Eylacen niet eer
Eer ghi mi coemt te baten
Och God ghi sijt mijn toeuerlaet
Daer allen minen troost op staet.
Hoet met mi gaet / hoet met mi gaet.
Doet mi doch v charitaet
Doet mi doch v charitaet
6.
In minen noot
So wilt mi doch beschermen
V liefde groot
Laet doch in mi verwermen.
Van duechden ben ic also cout
Vol sonden ben ick menichsout
Dwelck my seer rout / dwelck my seer rout
Och God wilt mijns ontsermen.
Och God wilt mijns ontsermen.
7.
Cort is den tijt
Die wij hier moghen leuen
Dies seker sijt
Elck wacht hem voer deewich sneuen
Want ons quaet leuen ende onbestier
Mocht ons brenghen int helsche vier
Noeyt meerder dangier / noyt meerder dangier
Die van God sijn verdreuen
Die van God sijn verdreuen
8.
Kendt v misdaet
Ende leeft bi wisen rade
This sorghelijck / iaet
Te sondigen vroech en spade
Ons cranc ghelooue doet ons den noot
Dat wij dus bli- || uen in sonden groot
Verblint ter doot / verblint ter doot
Daer om bidt God ghenade
Daer om bidt God ghenade
9.
Biecht v in tijts
Dat God gheen sonden en vinde
Neemt gheen respijt
En doet niet ghelijc die blinde
Ende hout altijt den rechten pat
En wacht v voer dat helsce gat
Ick rade v dat / ick rade v dat
Dats tslot / aensiet het ynde
Dats tslot / aensiet het ynde
|
|