Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Dit is die wise/ ghelijck alst beghint. 1.
VAn liefden comt groot liden
Ende onder wilen groot leyt
Het minde die maget || Maria
Den Gods soon wel ghemeyt
Si minde hem seer/ si hadde hem lief
Als si hem sach in liden
| |
[pagina 75]
| |
Si en conde gherusten nyet.
2.
Maria was in liden
Si ghinc eenen droeuen ganc.
Tot Hierusalem voer die poorte.
Die si ontsloten vant
Daer sach si comen haers herten lief
Met eenen cruce gheladen
Als een verbannen dief
3.
Met weenentlijcken oogen
Dat si hem ane sach
O my sprac si doen eylacen
Is dit den droeuen dach
Die van my is ghepropheteert
Dat mijn hert soude doersniden
Dat wreede bitter sweert.
4.
Iesus sprak o moeder
Ghegroet so moet ghi sijn
Dit cruys dat moet ick draghen
En liden voer hem die pijn
Dat Adam mijn knecht heeft verdient
Voer hem so wil ick steruen
Het was mijn beste vrient
5.
Nu ben ick hier alleyne
Een moeder onghetroost
Ick sie hem in groten liden
Den Gods soon alder hoochst
Ic min hem seere/ ic heb hem lief
Mocht ic hem helpen draghen
So en waer mijn liden niet.
6.
Ghi en sijt daer niet alleyne
Sprac een engel wten throon
Ick ben een bode tot v ghesant
Wel edel maghet schoon
Mijn heere heeft mi tot v ghesant
Dat ick v soude troosten
Ic en weet oft ghi hem yet kant?
7.
En soudick hem niet kennen
Ick kenne hem badt dan ghi.
Ick sach hem in sijn liden
Dies lijdt mijn herte pijn ||
Sijn armen sach ick wt recken
Ende aenden cruyce slaen
8.
Ick heb hem horen roepen
Tot sinen vader inden throon
Och willet hem vergheuen
Sij en weten niet wat sij doen
Ontfermt v ouer der menschen schout
Daer ick den doot om steruen moet
Al aen des cruycen hout
9.
Die engelen songen schone
Al inden hooghen throon
Die alder bedroefste moeder
Stont onder des crucen boom.
Die moordenaer riep ontfermelijck
O heere wilt mijnder ghedencken
Als ghi coemt in v rijck.
10.
Iesus verblide hem seere
Al in des moordenaers roep
Hi keerde hem wederomme
Met eenen sachtmoedigen moet
Hi sprac o vrient sijt dies wijs.
Ghi sult heden wesen
Met mi int paradijs
11.
Hi sprac tot sijnder moeder
Daer hi aent cruyce hinck
Met weenentlijcker stemmen
Och vrouwe siet hier v kint
Ioannes lieue discipel mijn
Siet die bedroefde moeder
Want die beuele ick dy.
12.
Sijn leden begonden te beuen
Hi was seer onghedaen
| |
[pagina 76]
| |
Die doot street tegen dat leuen
So begonste sijn herte tontgaen.
Hi riep Hely o vader mijn
Hoe hebdy mi nu ghelaten
In desen allendighen schijn
13.
Och alle creatueren
Die God ghescapen heeft
Coemt nu tot deser vren
Met eenen bedroefden gheest
Helpt ons beclaghen den grooten noot
Die hemel ende aerde ghescapen heeft
Die hanghet hier naect en bloot.
14.
Die hoghe prince der heeren
Iae mede die hemelsche vorst
Met also heesscher stemmen
Sprack hi/ o mi dorst.
Die soete fonteyn diet al versaet
Met edick ende met galle
Wert hi ter stont ghelaeft
15.
Die eenighe soon des vaders
Iae mede die hooghe God
Daer die engelsche scaren voer knielen
Is nu der ioden spot
Sij riepen cruyst hem/ si maecten iolijt
Ghi en sijt gheen || coninck van Israhel
Ghi sijt vermaledijt
16.
Sijn ooghen begonsten te weynden
Die minne bewees haer cracht
O vader daer ghi mi om hebt ghesonden
Dat heb ick nu al volbracht
Sijn stemme was lude ende heesch
Met eenen gheneychden hoofde
Gaf God sinen gheest.
|