Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
EEn vrolijck salich nyeuwe liet
Alder werelt openbare
Vanden kindeken dat Iesus hiet
Te Bethleem wast ghebaret
In groter armoeden ende verdriet
Somen daer mocht aenscouwen
En daer leedt hi swaer verdriet
In alsoe groter couwen
2.
Al was hi coninck van groter macht
Wt Dauids geslachte gheresen
Hi heeft so langhe na ons ghewacht
Doer hem sijn wij ghenesen
Doen hi in dyen donckeren nacht
Gheboren was midts desen
Die heer was van groter macht
Heeft ons verlost in desen
3.
Dat cleyne kindeken suuerlijc
Is ons ghegeuen ghemeyne
Die nu wort dus iammerlijck
Verdruct int swerelts pleyne
Want die moeder suyuerlijc
Si hoorde hem clagelijc weenen
| |
[pagina 73]
| |
Ende al met tranen druckelijck
Haer hert was cout als steenen
4.
Daer wayden menige winden stout
Rijm/ haghel/ onghetemperde lochte
Dat kindeken lach daer naect en bloot
Van couden also onsochte
Nu peyst hoe Mariam dat verdroot
Dat si hem niet leg- || ghen en mochte
In doecxkens sijn sijn ledekens bloot
Des had si grote ongenoechte
5.
Och wat armoeden moeste daer sijn
Doen die soete Iesus daer neder lach
Want van coude leedt hi grote pijn
Gelijcmen daer openbaer aensach
O Maria maghet sijn
Dat was v een swaer ghelach
Want daer en was gheen sonnen schijn
Ost vier/ of eenich ander solaes
6.
O heilige Ioseph suyuer ende reyn
Wat groten liden hebt ghi ghehadt
Als Maria die maghet fijn
Al op die aerde neder sadt
En si dat costelic godlijc greyn
In alsulcken couden nacht
Tusschen twee stomme beesten alleyn
Bewaerde dien dierbaren schat
Doen lach hi daer die heere was
Wten vrienden ende maghen
Ter werelt ghecomen als die sonne doert glas.
Voerwaer ten sijn gheen sagen
Na dat Maria sijns ghelach
Si heeft die sorghe ghedragen
Want si behoetster van hem was
In alle sine daghen.
8.
Nu hoort hoe couden weder dat was
Doen dat kindeken lach inder crebben
Want daer hout noch brandt en was
Wat sorge moeste Maria doen hebben
Want daer siluere noch gout en was
Om den cost dair af te betalen
Doe Maria te Bethleem was
Waer mocht sijt doen al halen
9.
Nu hoort hoe dat kindeken teeder van leden
Al nae die ioetsche wet
Opten achtsten dach was besneden
Ende oock inden tempel gheset
Daer si hem grote pine deden
Ende sijn bloet voer ons storte wt
In sijn soete ionghe leuen
Die heere der werelt wijt.
10.
Hoe heeft ons nu die heere besocht
In sinen ionghen leden
Ende in sijnder herten gheknocht
Dies wi wel moghen leuen
Want hem is een grote offerande ghebrocht
Gout/ myrre/ ende wieroock || mede
Bi eender sterren is hi ghesocht
Wt menighe vreemde stede.
11.
Och laet ons nu tot Bethleem gaen
Daer dat kindeken inder cribben leet
Die met sonden sijn beuaen
Hy is altijt bereet
Ons in sijn ghenade te ontfaen
Als ons die sonden sijn leet
Hi wil ons in sijn rijck ontfaen
So ons die scrifture leert
12.
O opperste heere der heeren
Wilt ons toch een kindeken sijn
Als wij van deser werelt sullen moeten scheeden
| |
[pagina 74]
| |
Met drucke/ met liden/ ende pijn.
Ende wilt ons dan bereyden
Die costelijcke fonteyn
Dijnre grooter ontfermherticheyden
Ende verlost ons vander hellen pijn.
13.
Och heere wilt onser ghedincken
Doer den kelck der bitterheyt
Dyen v liefste moeder moeste drincken
Hi was haer soe swaer bereyt
Doen ghi aenden cruce wout drincken
Die selle bitterheyt
Wilt ons v bitter liden doch schincken
Al sijn wij qualijck bereyt
14.
Och heere ick mach wel beclaghen
Minen verloren ionghen tijt
Dyen ick aldus heb ghedragen
Met sonden/ met haet ende nijt
Ende wilt doch dyes niet ghewaghen
Als ghi ten ordeel comende sijt
Want mijn siele sal claghen
Ouer mi allendich catijf
|