Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise1.
DIe soete Iesus lach int hoy
Ootmoedelijc voer twee stomme beesten
Al en was tlogijs niet alte moy
Nochtans hielt hi daer in sijn feeste
Met haer/ die alder ootmoedichste van gheeste
Sijn moeder/ dat suyuer maechdekijn
Dies singhen wij nu/ die minste en oock die meeste
Gebenedijt moeten si beyde sijn.
2.
Als Iesus lach int open huys
Ende beesde met sijn leden cout
Maria aensach dat groot abuys
Si dancte hem seer menichfout
Dat hi die vaders ionc ende out
Verlossen soude wter hellen pijn
Des singhen wij nu met herten stout
Ghebenedijt moeten si beyde sijn.
3.
Maria nam in corter stont
Haer lief kint op haren schoot
| |
[pagina 72]
| |
Ga naar margenoot+Si leyde hem aen haer borstkens ront
Die si hem minnelijc boot
Si custe hem aen sijn mondeken root
Ende seyde/ willecoem sone mijn
Des singen wi nu cleyn ende groot
Ghebenedijt moeten si beyde sijn.
4.
Een cribbeken stont daer ghemaect
Te Bethleem tot dyer tijt
Daer leyde si hem in al naect
Iesus Gods sone ghebenedijt
Ende verlosser van alle der werelt wijt
Met sinen bloede met sijnder pijn
Dies singhen wij nu met groten iolijt
Ghebenedijt moeten si beyde sijn.
5.
Ioseph maect ons een papken soet
Haestelijck in corter tijt
Laet mi doch voeden dit onnosel bloet
Het is Gods sone ghebenedijt. ||
Hi sal verlossen dies seker sijt
Adams geslachte wt haer gepijn
Dus singen wij nu ende talder tijt
Ghebenedijt moeten si beyde sijn
6.
Ioseph sprack met haesten groot
Al tot die maget goedertieren
Ey lacy hier en is melck noch broot
Wat soude ick doen ten viere
Doen verscricte die maghet al so schiere
Vol tranen quam haer vriendelijck aenschijn
Dus singhen wi nu in goeder manieren
Ghebenedijt moeten si beyde sijn.
7.
Si die dit liedeken heeft ghedicht
Was seer bedruct van sinnen
Eylaes sy en was niet wel verlicht
In goddeliker minnen
Mer si droech doleur int herte binnen
Ende daer toe menich swaer ghepijn
Maer si sanghet om troost te ghewinnen
Ghebenedijt moeten si beyde sijn.
|
|