Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise/ oft op valckensteyn1.
IC sat op eenen vasten gront
Daer as so moeste ick sceyden
Ick quam in eender corter stont
In een alsoe dorren valleye
2.
Nu sceyden wi nu sceyden wij
En dat moet ymmer wesen
So wie die minne Iesu draecht
Hi sal dat sceyden wel ghewesen.
3.
Mijn hert was in pine groot
Dat sceyden moeste ick leeren
Natuere sterf so menigen doot
Eer si haer af conde ghekeeren.
4.
Dat scheyden was my een bitter woert
Dies werdick wel gheware
Dat sceyden heeft mijn herte verstoert
Gebracht in groter vare
5.
Dat sceyden is een edel schat
Diet wel ghelijc can draghen
Sij wandelen inder minnen pat
Die scheyden sonder claghen
6.
Eylaes dat en heb ic niet gedaen
Dat moet ick nu besueren.
Tsceyden heeft mi leet ghedaen ||
Dat doet mi dicwils trueren
7.
Nochtans wil ic in minen moet
Dat sceyden niet versmaden
Dat sceyden sal mi wesen goet
Ick heb mi wel beraden
8.
Als ic seker waende te sijn
So vinde ic mi al bedroghen
Dat sceyden is mi een medecijn
Ick ben daer mede ontuloghen
9.
Gode wil ick mijn herte opghenen
Ende gaens nu alle menschen af
Ende soecken troost int eewich leuen
Daer ick gheduerich in bliuen mach.
10.
Herte ende sin wil ick hem opghenen
Bouen al dat ic ghescapen weet
Dat ic so spade hebbe begonnen
Dat is mi met goeder herten leet
|
|