Een devoot ende profitelyck boecxken

[p. 68]

⁺

+ Fo. xxvij.^v-Fo. xxix.^r

N^o. XLVIII.

ℂ Op die selue wise/ oft op mijn heere van valckesteyn

1.
DIe minne van Ihesus becoemt ons wel
Wi connense wel gheliden
Mer temptacie en voerspoet snel
Es ons so swaren striden
2.
Wat ic beghinne/ wat ic aengae
Ic en cans niet wel gheliden
Dat doet die bose viant al
Met sijnder valscher wisen.
3.
Laet ons aenroepen ende begheeren troost
Al aen der maghet Marien
So sal die viant ymmer moeten
Met alle crachten van ons vlien.
4.
Ick rade alle menschen ionc
Sijnt mannen oste vrouwen
Dat si haer herten tot Gode keeren
Ten sal hen niet berouwen
5.
In deser werelt en is gheen troost
Het is al cost verloren
Laet ons aen god soecken troost
Sijn troost mach ons vromen
6.
Wi en souden na gheen menschen vraghen
Wilden wi gode behaghen
Want hy mach ons sijn gracie ghenen.
Bi nachte ende oock bi daghen
7.
O mensche keert v tot Gode waert.
Het sal v veel meer baten.
Ende leert van herte oetmoedich sijn
Ende leest in charitaten
8.
Dye dit liedeken heeft ghemaect
God die wilse in duechden sparen
Ende brengense na deser corter tijt
Al in der enghelen scharen ||