Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
TUsscen twe hoge bergen
In eenen groenen gaert.
Daer bleef mijn lief in stride
Van hoogher minnen aert
2.
Ay lief van hooger minnen
Hoe sidy dus mismaect
Al om een arme siele
Die luttel nae v haect
3.
O heere doer v ghenade
Ende doer v minne goet
Hoe gaerne soude ick spreken ||
Tot v een minnelijck woert
4.
Och edel creatuere
Vry edel siele sijn
Wat dinghe is v begheeren
Dat ghi versoect aen mi
5.
Och lief van hooger minnen
Van hoogher minnen aert
Hoe gaerne soude ic mi vermeyen
In uwer minnen gaert
6.
Och wildy v vermeyden
In mijnder minnen gaert
So moet ghijt al begheuen
Daer uwen sin toe staet
7.
Hoe sal ick dat ghemaken
Mijn lief mijn minnekijn
Altemael te versaken
Dat is seer groote pijn
8.
Och edel creatuere
Wel edel siele mijn
Slaet doch op v ooghen
Aensiet mijn bitter pijn.
9.
Aenden cruce wilt versinnen
In eender perssen swaer
Stont ick om uwer minnen
Om v te ontfangen aldaer
10.
O Iesu lieue heere
Ick bid v staet mi by
Ick wil die werelt laten
Al om die minne van dy.
11.
Ick wilse nv al begheuen
Ende soecken diep ootmoet
Op dat ic hier nae mach leuen
Ende vercrigen dat eewige goet
|
|