Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendNo. XXXVIII.aant. 1.
Ghi die Iesus wijngart plant
Verblijt v op dat soete lant
Daer ghi sijt toe vercoren ||
Die cierheyt is daer onsprekelijc
Die blischap onbegripelijck
Die v daer sal gheboren.
2.
Die claerheyt/ vruecht uwer suyuerheyt
Die v Iesus daer heeft bereyt
Die en is v niet te noemen
Ierusalem eest lant ghenaemt
Vol heylicheden schoon bequaem
Verciert met alle vruechden.
3.
Van hier so en coemter niemant in
Hy en draecht int herte Iesus min
Ende is verciert met duechden
So sijnse die Iesus wijngaert planten
Iesum neerstelijck te dienen hen seer verlanct.
Om corts bi hem te comen
4.
Het sal daer dueren sonder verganck
Het is veel schoonder dan ost waer van gout
Verciert met gulden bloemen
Die scoonder blincken dan die maen
Die sonne si te bouen gaen
Met haren soeten bloemen
5.
Van pueren goude ist schone ghepaueyt
Met soete rooskens ouerspreyt.
Die sullen daer eewich dueren
Och hoe onsprekeliken claer
Dat god daer is ons lieue vaer
Tis wonder meer dan wonder
| |
[pagina 58]
| |
6.
Hi is die eewelijc heeft gheweest
Die allen dinghen sijn wesen geeft
Hier bouen ende ooc hier onder
Wt hem vloeyt alle soeticheyt
Dye haer so verre so wijt wt spreyt
Al tot des lants gulden mueren
7.
Hi is een eenich kint Marien soon
Ende is daer so wonderliken scoon
Die ons dlant heeft ghewonnen
Hi sidt daer in dat soete lant
Sinen lienen vader ter rechter hant
Voer alle creaturen
8.
Die hem aenscout is so verblijt
Thien duysent iaer en dunct hem gheen tijt
Tis waer diet can versinnen ||
Want den tijt en is daer niet
Daer nemmermeer en is verdriet
Van buten noch van binnen
9.
Men is daer altijt vro en bli
Van alle sorghen is men vri
Daer en can gheen weelde gebreken
Tis so soet ende genoechlijc
Veel scoonder claerder ongelijc
Dan hondert duysent sonnen
10.
Maria is daer coninginne
Alle reyn maechden sijn haer gesinne
Die Iesus heeft vercoren
Maer si is bouen al bemint
Van sconincx soon haer lief kint
Als balsem onder den doren
11.
Haer croon blinct wonderliken scoon
Met gulden lelien cleet se haer soon
Gout rosen sijn haer sampellen
Recht als die sonne ende ooc die maen
Die vander sonne haer licht moet ontfaen
So doen van haer de sielen
12.
Haren roke gaet bouen alle cruyt
Ende bouen cymbalen hare gheluyt
Ende alle ghescal van pipen
Die borghers draghen daer al een croon
Sij singhen dat clinct inden throon
Osanna alleluya a a a a
13.
Daer is der maechden sanck so scoon
Si singhen daer met des conincx soon
Ende met der maghet Maria
Och hoe dat luyt ouer hemelrijc
So scone/ so claer/ so ghenoechlijck
En can gheen mensch begripen
14.
Haer croone heeft eenen rosen crans
Si gaen met Cristo aen den dans
Sij lonen God sonder merren
Dat cransken is van sulcker virtuyt
Elck roosken gheeft meerder claerheyt wt
Dan sonne/ mane/ en sterren.
15.
Gheen cruyt op aerden en is so soet
Dat riect ghelijc dat cransken doet
Al waer alle cruyt fioletten
Sij hooren ooc dat soet gheluyt
Coemt mine beminde suyuer bruyt
Rust nu in mijn armen beyde
16.
Si sijn beuaen met Iesus min
Als Cherubin ende Seraphin
Van groter liefden si vloeyen
Ghelijc de sonne is sijn aenscijn
Si volgen dat soete lammekijn
Ghecleet met witten stolen
17.
Die enghelen/ die sielkens sijn al ghemeen
Sij singen soe blidelijcken onder een ||
Voer den coninc vanden troone
Lof si v heere van Sabaoth
Almachtich/ ewich/ heylich god
Een wesen in drie personen
| |
[pagina 59]
| |
18.
Ghi sijt die ewich heeft gheweest
In hemele/ in aerde/ met uwen gheest
Doet vrolijck iubileren.
Och this so ghenoeghelijck
Te hooren van dat soete rijck
Die eerbaerlijcken leuen
19.
Ende dienen Ihesum trouwelijc
Sinen wijngart planten si blidelijc
Dese werelt si begheuen
Maer als haren tijt is ghedaen
Sal hyse lieuelijck ontfaen
Ghelijc der sonnen verheuen
20.
Och waerlijck hi is so seere verblint
Die dit tijtlijcke goet voert eewich bemint.
En wil des lants vergheten
Nochtans sien sij dat fundament
Dat wel vercierde firmament
Met sterren ende met planeten
21.
Ic en heb v niet soe veel gheseyt
Dit lant en is veel bat bereyt
Dan eenich mensch can dincken
Plant vry ghi sult daer sijn verblijt
Mer siet dat ghi ghestadich blijft
Vwen tijt die naect allincken
22.
Dat Iesus v daer sal ontbien
V wercken sal hi ouersien
Ende na v duechden loonen
Och God verleent een yegelijc
Op dat lant te dincken hier op aertrijck
En dat namaels te bewonen
|