Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
IEsu alder soetste heere
Wilde ghi v hertelijck tot my keeren
Ick soude vergheten mijn groote quale
Ende sijn ghesont altemale
Want v minne die is so soet
Ghi siget heer Ihesus diet mi doet
2.
En moet mijn siele niet seer verlangen
Die in den kercker leyt gheuanghen
Met sware ketenen is si ghebonden
Si heeft so menige diepe wonde
Om sinen wil hi is so goet
Ghi siget heer Ihesus diet mi doet
3.
Al mochte ict sinen vrienden claghen
Den meesten last die moet ick selue draghen
Ick duchte ten soude mi helpen niet
Ghi siget die mijn herte so wel doersiet
Daer om beswaert foe seer minen moet ||
Het is heer Iesus diet mi doet
4.
O Iesu alder soetste heer
Ick weene ic suchte so langher so meer
Mi dunct ghi en acht op mi niet seer
Werwaert dat ic mi henen keer
Altoos beswaert mi minen moet
Ghi sighet heer Iesu diet mi doet
5.
O God wat sal ic beginnen
Mijn siele wort ghecruyst van binnen
Ick ben bedruct in alle mijn sinnen
En seer siec van groter minnen
Om sinen wil/ hi is so goet
Ghi sijt heer Iesu diet mi doet
6.
Den soeten most die ic ghesmaecte
| |
[pagina 60]
| |
Die mi van binnen also gheraecte
So dat ick nyet en conde ghedueren
Nacht noch dach te geender vren
Want den wijn die was so goet
Het is heer Iesus diet mi doet
7.
Conde ic noch eens daer toe gheraken
Ic meyne ic soude mi vermaken
Ick soude vergheten mijn groote smerte
Ende verbliden mijn droef herte
Want die wijn is also soet
Ghi sijt heer Iesu diet mi doet
8.
Iammer groot quam mi te voren
Doen ic mijn liefken had verloren
Socht ic hem ic mocht hem vinden
Nu is mijn herte in grooter allinden
Daer af beswaert soe seere minen moet
Ghi sighet heer Iesu diet mi doet
9.
Sal ic v lief lange ontberen
Mijns herten bloet sal ic verteren
Ende dat merch wt minen beenen
Het is heer Iesus die ic meene.
Want sijn minne is so soet
Ghi sijt heer Iesu dict mi doet.
10.
O God en sal v nyet ontfermen
Ghi hoort mi suchten ende kermen
Sal ic v lange moeten deruen
Ic ducht ic sal van minnen steruen
Om uwen wil/ ghi sijt so goet
Ghi sijt heer Iesu diet mi doet.
11.
Den edelen wijn die sach ic vloeden
Och God hoe wel was mi te moede
Ic hadde dorst/ ick meynde drincken
Hadde mi mijn liefken willen schincken
Van sijnre minnen si is soe soet
Het is heere Ihesus diet my doet.
12.
Den schoonen boomgaert sach ick open
Daer was so menighe roose ontloken
De alder scoonste die ic sach staen ||
Dat was mijn liefken wel ghedaen
Sinen roke die was also soet
Het is heer Iesus diet mi doet
13.
Mijn hertken stont soe vast ghesloten
Mijn liefken quam ick dede dat open.
Hi was gheciert met eender croone
Ende sijn aenschijn dat blinct soe schoone
Dat mi verblijt so seere minen moet.
Ghi sijt heer Iesu dyet mi doet.
14.
Een beddeken van minnen dat ick bereyde
Met rode rosen ict ouerspreyde
Met witte lelien/ met sioletten.
Daer lach de here sonder smetten
Bi hem te rusten waer wel goet
Heer Iesus minne die is so soet.
15.
O suyuerlike claer sonteyn
Der werelt sidy alghemeyn
Maer ic meyn van die liefste te sijn
Toont mi dat dies bid ick dy
So sal seere verbliden minen moet
Heer Iesus minne die is so soet.
16.
Mijn liefken wert beroert van binnen
Hi nam my in den arm van minnen
Och God hoe wel mocht mi gelusten
Doen ic met mijn liefken ghinc rusten
Bi hem te rusten dat waer wel alsoe goet
Heer Iesus minne die is soe soet.
17.
Och alderliefste wtuercoren
Hi en is ter werelt nyet gheboren
Die ic voer v sou willen minnen
Gheeft mi toch een claer bekinnen
So sal ic dragen hoogen moet
Het is heer Iesus diet mi doet.
18.
Mijns liefkens herte is opghebroken
| |
[pagina 61]
| |
Die edel balsame is daer wt gheuloten
Dats mijnder sielen een medecijn
Voer al haer siecten/ voer alle mijn pijn
Die edel balsem is so goet
Heer Iesus minne is so soet
19.
Noch dede hi mi bekinnen
Die grote cracht van sijnder minnen
Ick custe sinen roden mont
Mijn siele was te mael gesont
Doen verblide seere minen moet
Heer Iesus minne die is so soet.
20.
Naden slaep so ghingen wi spelen
O god hoe sal ic dat ghehelen
De grote fierheyt die ic daer vant
Daer bouen in dat soete lant
Daer af verblide mi minen moet
Heer Iesus minne die is so soet. ||
21.
Als ick mi aldus ghinc verspelen
Soe sach ick maechden wonder vele
Mer daer was een die was soe schoon
Die keyserinne al vanden troon
Van roosen hadde si eenen hoet
Heer Iesus minne die is so soet
22.
Die patriarcken ende propheten
Als si ter tafele waren gheseten.
Den nieuwen most wert daer gheschoncken
Dat sij alle waren droncken
Want die wijn die was so soet
Heer Iesus minne die is so goet
23.
Die martelaren dragen daer alle een croon
Sij blincken van rooder verwen schoon
Allen druck ende liden is daer vergheten
Want si sijn in dat clare weten.
Hier op dragen si hoogen moet
Heer Iesus minne die is so soet.
24.
Die engelkens blasen daer die trompetten
Santori pipen en die claretten
Die soete snaren/ die orghelen schoone
Die luyden/ dattet clinct inden troone
Daer af verbliden alle swaren moet
Heer Iesus minne die is so soet.
25.
Iesus stont daer in die sale
Ende sprac met vriendeliker tale
Schoon lief wilt ghi hier verbliden
Soe moet ghi noch een luttel liden
Het fal v wesen alsoe goet
Want mijn minne die is so soet.
26.
Nu wil ic mi vander werelt gaen keeren
Heer Ihesum wil ick minnen leeren
Waer ick mi keere waer ic mi wende
Die werelt is alsoe vol allenden
Dat my beswaert so seere minen moet
Het is heer Iesus dyet mi doet.
|