Een devoot ende profitelyck boecxken

N^o. XXXVIaant.

ℂ Op de selue wise/ oft Op eenen palm auont is dat geschiet. - Si souden trecken doer der heyden.

1.
HEt staet een casteel een rijc casteel
Een casteelken op hooger tinnen
Daer singhen die engelen so soeten lof
Heer Iesus woont daer binnen
2.
Tot desen casteele quamen wi gaerne
Conden wi daer toe gheraecken
Het blinct daer al van pueren gouwe
Die mueren en oock die daken
3.
Tot desen casteele en comen wij niet ||
Wi moeten vromelijck striden
Die wilde zee vlack en diep
Die moeten wij ouer liden
4.
De boose gheesten comen ons aen
Met temptacien willen si ons verladen
Sij hebben daer so menigen te gronde gheseylt
Met hare valsce raden
5.
Sij wenschen ons dicke inden gront
Sij souden ons gherne verdrincken
Wij anckeren ons herte in Iesus wonden
Wij latent daer inne sincken
6.
Laet ons die wilde zee ouer varen
Met also blide sinnen
God die heere wil ons ghesparen
Dat wi dat casteel mogen winnen