Een devoot ende profitelyck boecxken

N^o. XXXII.aant.

ℂ Op die selue wise.

1.
ICk heb een traech eselkijn
Dat valt mi suer om timmen
Dat is dat arme lichaem mijn
Hoe gaerne sou ic hem dwingen
2.
Hi leuert mi so menigen strijt
Hi maket mi soe suere
O lieue heere dat claech ick dy
Helpt mi mijn eselken vueren
3.
Ic wil mijn eselken temmen wel
Ende houden hem onder die roede
So moet hi mi gehoorsaem sijn
Aldoet hijt also node
4.
Ten eten is hi wel bereyt
Noode wil hi sober wesen
Wanneer hem yemant yet misseyt
Daer tegen wil hi streuen.
5.
Wanneer sijn cribbe is wel gheuult
So is hi also blide
Hi gaet so node wt sinen spoer
Ghewelt so moet hi liden.
6.
Tsauonts wil hi slapen gaen
Men derf hem daer toe niet driuen
Mer smorgens als hi op sal staen
So wil hi langher bliuen
7.
Wanneer mijn eselken dus weeldich wert
Dan en doet hi niet dan claghen
Der minnen iock is hem te swaer
Noode wil hi hitte verdragen.
8.
Och woude hem mijn eselkijn
Hier een weynich liden
Al op den berch van Israhel
Daer sal hi namaels weyden
9.
Daer is een weyde also scet
Ende also goet van smaken
Daer soude hem mijn eselkijn
Och also wel vermaken
10.
De riuierkens sijn daer also soet
Die daer onder die berghen vlieten
Daer suldy af drincken mijn eselkijn
En lates v niet verdrieten ||
11.
Die dit liedeken heeft gedicht
Si was noch cout van minnen
Si heeft een traech eselkijn
Hoe gaerne soudesi hem dwingen