Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
Mijn hope/ mijn troost/ minen toeuerlaet
Dat staet aen onsen heere
Sijn hope gheeft ons soeticheyt
Heer God oft ick bi hem ware
2.
Ic heb der werelt so lange ghedient
Dat mi nu rout so seere
Haer cierheyt wil ic oerlof gheuen
En dienen onsen heere
3.
Want sijn minne is so goet
Ick hope hi en sal mi niet versmaden
Ic wil tot sijnder scolen gaen ||
Ende bidden hem ghenade.
4.
Mer doen ic eerst ter scholen quam
Die schole der godliker minnen
Die lessen en conde ick gheleeren nyet
| |
[pagina 52]
| |
Dat deden mijn weerlicke sinnen
5.
De eerste lesse diemen mi gaf
Was dat ic steruen sou leeren
En doen mi alder menschen af
En keeren mi tot onsen heere
6.
Sij deden mi mijn cleeder wt
Sij deden mijn hayr afsniden
Sij deden mi aen een mantel ruyt
En leerden mi der oerden getiden
7.
Hoe mi doen te moede was
Dat en sal ic niemant clagen
Dan hem die inden hemel woont
Die salt mi helpen draghen
8.
Die dagen waren mi te lanc
Snachts en condic niet gheslapen
Ic dacht so dicke in minen moet
Hoe ick dat soude maken
9.
O here God helpt ghi mi niet
So en mach ict niet gheliden
Die viant sijn scutten op mi schiet
Sij quetsen mi aen alle siden
10.
Mer als ic dencke in minen gront
Dat ick die weerelt heb ghelaten
Soe verblide ick mi in menigher stont
In vruechden bouen maten.
11.
Noyt en dranc ic beter dranc
Wt coppen noch wt scalen
Dan wt Iesus soete borst
Och hi gheneest van alle qualen
|
|