Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
GOd groet v coninghinne
Maria soet iolijt ||
Ghi sijt een vat vol minnen
Altijt ghebenedijt.
O weerde bruyt der weelden
Dijn lof is eewich lanck
Fonteyn vanden eewigen leuen
Schenct ons der minnen dranc
2.
God groet v alder claerste
Diemen aenscouwen mach
Maria ons bewaerster
Ghi sijt een eewich dach
Wel schone sonder verdrieten
Vol alder duechden groot
Och laet mi dijns ghenieten
O weerde roose root
3.
God groet v morgensterre
Een spieghel sonder smet
Die schoonste sonder merren
Reyn lelie onbeulect
Maria edel sonne
Ick wil v gheuen prijs
Ghi sijt die suyuer bloeme
Vercierende dat paradijs
4.
God groet v keyserinne
Peerle der ioncfrouwen schoon
Ghi blinct ghelijck die sonne
Al in des hemels throon
Daer bistu wtuercoren
Die spieghel al volmaect
Als een verchierde roose
Oock moeder ende maecht.
5.
God groet v suyuer maget
O soete medecijn
O dach die eewich daghet
Ick waer so gaerne bi dijn
En wilt mijns niet vergheten
Och edel honich raet
Als mi mijn herte sal breken
In die vre mijnder doot.
|
|