Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise. Een liedeken van. S. Barbara1.
INt herte heb ick vercoren
Die alderscoonste maecht
Vry edel is si gheboren
Want si die croone draecht
| |
[pagina 37]
| |
Sy is reyn sonder blame
Vrouwe vander biechten claer
Barbara reyn is haren name
Mijn siele beueel ick haer
2.
Van Origenes soete
Wert si so wel gheleert
Hi sant haer twifels boete
Si wert bi hem bekeert
Haer doopte een leeraer Cristi
Int soete water claer
Dat ghelooue si doen wiste
Mijn siele beueel ick haer
3.
Haer vader dede haer funderen
Een slot met veynsteren twe
Ende die triniteyt ter eeren
Dede si die derde maken me
Waer om dat hi vergramde
Ende woudese dooden daer
Maer si vloot alst betaemde
Mijn siele beueel ick haer
4.
Hi volchde haer seer wreede
Daer si gheuloden lach
Om haer te doen groot leede
Een herder diese sach
Hi wijsdese den vader
Sprinchanen werden daer
Sijn scapen alle gader
Mijn siele beueel ick haer
5.
Hi namse met sellen moede
Ende sleyptese achterwaert
Hi sloechse totten bloede
Seer wreet ende onueruaert
Den rechter ghinc hijt clagen.
Hoe dat si Cristen waer
Doen wert si seer gheslagen ||
Mijn siele beueel ick haer.
6.
Die rechter ghinc versieren
Hoe hyse mocht pinigen gaen
Met zenuwen van stieren
Ghinc hyse iammerlijck slaen
Haer siden ghinc hi branden
Met vierighen lampen swaer
Maer si gaft in Gods handen
Mijn siele beneel ick haer
7.
Daer na dede hyse sluyten
In eenen kercker vast
Gods hulp en was daer niet buten
God troostese inden last
Si wert van allen seere
Ghenesen openbaer
Si danctes onsen heere
Mijn siele beueel ick haer.
8.
Die rechter dit aensiende.
Dat si aldus ghenas
Hi was haer doen bediedende
Dat Machomets gracie was.
Si danctes int ghemeene
Met bliden sinnen eerbaer
Iesum van Nazareene
Mijn siele beueel ick haer
9.
Met smeecken noch mit striden
Dat hyse niet en verwan
Hi ghinc haer borsten assniden
Die boose felle tyran.
Al naect dat hyse leyde
Dwelc maechden gaet te naer.
Gods engel datse cleyde
Mijn siele beueel ick haer.
10.
Ten lesten wert die maghet
Om Iesum dlijf berooft
Haer vader onuersaghet
Die heeftse selue onthooft
| |
[pagina 38]
| |
Si badt tot dyen tiden
Voer alle menschen eenpaar
Die dencken om haer liden
Mijn siele beueel ick haer
11.
Beurijdt mi weerde schoone
Ghi sijt mijn toeuerlaet
Helpt mi int shemels throone
Veruaert den viant quaet
Helpt dat wi biechte spreken
Met rouwiger herten claer
Van sonden ende ghebreken
Mijn siele beueel ick haer
12.
Nu laet ons alle gader
Haer dienen met groter vlijt
Op dat si God den vader
Voer ons bidde tot alder tijt
Op dat wij doer haer bede
Ende haer martelie swaer
Ghebruyken den eewigen vrede
Mijn siele beueel ick haer.
|