Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise1.
GOd groet v suuer bloeme
Maria maghet sijn
My helpt dat ick v noeme
Lof moet v altijt sijn
En waerdy niet gheboren
O reyne maghet vry
| |
[pagina 36]
| |
Wij waren alle verloren
Och ick beuele mi dy
2.
Dat was van Adams sonden
Mer God dien ghi hebt ontsaen
Die heeft den bant ontbonden
Wij hebben ghenade ontfaen.
Al in vyf duysent iaren
Was hem niemant weerdich dan ghi
Te dragen maget clare
Och ick beuele mi dy.
3.
Met recht sidy verheuen
Al bouen der engelen schaer
Al ben ick hier ghebleuen
Mijn herte is bi v daer
Och wilt mi doch gheleyden
Soe werwaert dat ick sy
En wilt van mi niet sceyden
Och ich beuele mi dy.
4.
O roose sonder doren
Fiolette van roecke soet
O bloeme die staet int koren
Neemt mi in v behoet.
Vol minnen ende ghestadich
Ootmoedich so sijt ghi
Och weest mi doch ghenadich
Och ick beuele mi dy
5.
Maria lelie reyne
Ghi sijt mijn toeuerlaet
Ghelijck dat een fonteyne
Die nemmermeer stille en slaet.
Alsoe deyldy v ghenade
Vwen dienaers staet ghi bi
Staet mi dan in stade
Och ick beuele mi dy.
6.
Mijn alder liefste vrouwe
O maghet ghebenedijt
In v dat ick betrouwe
Want ghi mijn weertste sijt
O suyuer maget schoone ||
Bidt uwen sone dat hi
My hemelrijck gheue te loone
Och ick beuele mi dy.
7.
O boete van alder qualen
Ontfangt die siele mijn
Als ick sal moeten betalen
Dat wij alle sculdich sijn
O minnelijck aenscouwen
Slaet doch v ooghen op mi
Maect dat ick worde behouwen
Och ick beuele mi dy
8.
Noch bid ick v om een bede
Als datghi mijn herte verlicht
Ende oock die siele mede
Van die dit heeft ghedicht
O gheminde Gods vriendinne
V ghenade begheeren wi
Des hemels coninginne
Och ick beuele mi dy
|
|