Een devoot ende profitelyck boecxken

[p. 39]

⁺

+ Fo. xiij.^r-Fo. xiij.^v

N^o. XVIII.

ℂ Op die selue wise

1.
O Droevighe herten allen
Nu maect eenen bliden moet
Al is den boom gheuallen
Hi en is noch niet verdroecht.
Hier om stelt v te vreden
Ende soect in God v rust
Die waerheyt sal altijt bliuen
Den boom kentmen aende vrucht
2.
Ghelijc men dat was moet bouwen
Ende bouwent eert wert verwrocht
So werden die wtuercoren
Dicwils van God gheproeft
Daer om stelt v te vreden
En blijft in God gherust
Die waerheyt sal altijt bliuen
Den boom kentmen aende vrucht
3.
Die boom moet dick verdragen
Eenen swaren hagel en wint
Wanneer dat comt den somer
die hier sijn vrucht voort bringt ||
Dan salmen eerstmael kennen
Wat boom dattet is
Die waerheyt sal altijt bliuen
Den boom kentmen aende vrucht
4.
Wilt aenden boom nyet scudden
Voer dat hi tidich is
Ghi sout die vruchten quetsen
Daer om laetse staen in rust
Voerwaer dat dunctmy beste
Want anders vergaet die duecht
Die waerheyt. &c.
5.
Sijn daer eenige vruchten
Die wat gheraket sijn
En wiltse niet verwerpen
Maer legtse inden wijn
Die wijn salt al verteren
Dat daer in gheraket es
Die waerheyt. &c.
6.
Ick seg v al te samen
Die van herten sijt beswaert
Dat ghi v gaet vermeyden
Met Iesum in sinen boomgaert.
Daer suldy die vruchten vinden
Al nae dijns herten lust
Die waerheyt. &c.
7.
Och mochten wij dit smaken
Als Magdalena heeft ghedaen
Doen si met Maria
Onder des crucen boom heeft gestaen
So waer mijn herte te vreden
Dat dicwils is ongherust
Die waerheyt. &c.
8.
Ick bid v al int ghemeyne
Dien de wake beuolen is
Siet ghi v scaepkens dolen
Beresptse al int best
Ende wiltse niet versmaden
Al is haer herte beswaert.
Die waerheyt sal altijt bliuen
Den boom kentmen aende vrucht