Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 33]
| |
No. XIII.aant. | |
ℂ Van sinte Vrsula.1.
O lieue heer/ danc/ lof/ ende eer
So moet v wesen emmermeer
Lof/ eere moet ghi ghewinnen
Die dese ionge maechden teer
Hebt ontsteken alsoe seer
Van binnen
Met uwer soeter minnen
2.
Wt brytannia/ als ick versla
So was gheboren Vrsula
Die weerde maget ghepresen
Eens conincx sone volchdese na
Om te hebben in huweliken sta
Als wij lesen
Lof moet haer altijt wesen
3.
Als dit verstoet/ de maget soet
So dachte si in haren moet
Hoe si hem mochte bekeeren
God sant in haren sinne goet
Dat si den edelen iongelinc soet
Soude leeren
Hoe dat hi God soude eeren
4.
Dit maechdekijn/ sprak vader mijn
Wi sullen ontbieden den coninc fijn
Dat hi drie iaer moet beyden
Dwelc hem sal duncken grote pijn
Ende dat hi mi thien duysent maechdekijn
Moet bereyden
Die ick tot God mach leyden
5.
Als dit heeft verstaen/ die coninc saen
Heeft hi die maechden vergaderen gaen
Als hy die heeft gheuonden
Dwelc hi oock gaerne heeft ghedaen
Ende heeftse tot brytannien aen
Ghesonden
Tot dyen seluen stonden
6.
Dese scare vermaert/ voer met ter vaert
Lancx den rijn te Rome waert
Also men vint bescrenen
Gods enghel heeft gheopenbaert
Des conincx sone van hooger aert
Verheuen
Datsi alle souden laten haer leuen
7.
Nu hoort toch hoe/ si quamen doe
Totter stede van Colen toe
Die vonden sij beleghen
Al vanden Huynen wreet van moe
Ende die liepen als honden onuroe
Hen teghen
Ende hebbense daer versleghen. ||
8.
Een wreet tyrant/ alst is becant
Liep daer hi Vrsula die maget vant
Ende wildese met hem vueren
Mer si verfmaeden als viant
Ende hi doerschootse alte hant
Tot dyer vren
Moeste si die doot besueren.
9.
Een coninck vry/ die was daer bi
Die heeft Cuneram ghelooues my
Ghenomen wt dyen stride
Hi voerdese te Renen/ daer woonde hy
Nae wert si ghedoot: so lesen wij
Wt nide
Lof si haer tallen tide
10.
Cordula vloot/ het scheen wel noot
Des anderen daghes hoort wonder groot
Soe quam si voorts alleene
| |
[pagina 34]
| |
Een wreet tyran haer ooc doerschoot
Dus bleef si met den anderen doot
Ghemeene
Lof si v maghet reene.
11.
Weest alle verblijt/ in groot iolijt
O suyuer maechden ghebenedijt
Slaet op ons v ghesichte
Want ghi mijn patronerssen sijt
Bidt voer hem tot alder tijt
Die dit dichte
Dat god sijn siele verlichte.
12.
O weerdige scaer/ o maechden eerbaer
Bidt voer ons goods moeder claer
O suyner maechden schoone
Bidt voer ons ende neemt ons waer
Op dat wi mogen comen daer
Ghi spant croone
Ghedenct ons inden throone.
|