Een devoot ende profitelyck boecxken

N^o. XII.aant.

ℂ Op die selue wise een liedeken van. S. Catharina

1.
O Godlicke cracht/ van hooger macht
Wat groter wijsheyt hebt ghi ghewracht
Al aen een maghet ionghe
Doen ghi haer dat vingerlinc bracht
Want si v diende dach ende nacht
Tot oorconden
Dat ghi haer trou hebt vonden
2.
Haer wijsheyt groot/ was sonder ghenoot
Die heylighe gheest haer herte doerschoot
Teghen die sarasine
Vijftich wise meesteren groot
Heeft si met redenen al versmoort
Ten fine
Die reyne maget Catharine
3.
Des keysers goet/ ende hoogen moet
Hebdy versmaet wt sinnen vroet
En coost den doot daer vore
Ghi boot den hals wt minnen soet
Daer wte ran melck voer roode bloet
Tot dyer vren
Bekeerden veel creaturen
4.
O edel martelersse vry
Al op den berch van synay
Deden v die engelen ter eerden
Daer v so menich ridder vry
Versoect wt edelre heerscapy
Met weerden ||
Ende olye van v begheerden
5.
Ick bid v patronersse vroet
Neemt ons allen in v behoet
Ende wilt ons wijsheyt gheuen
In vreden te leuen in minnen soet
Ende helpt ons aen dat eewighe goet
Sonder sneuen
Hier nae met v te leuen.