Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wijse1.
O Iesus bant/ o vierich brant
V heeft een suuer maecht playsant
Met eenen woorde ghewonnen
Dat dede haer duechdelijck onderstant
Waer by wort ons hier vre int lant
Ghesonghen
Met enghelschen tonghen
2.
Aue dat woort/ dat is ghehoort
Te Nazareth al in die poort
Al na des vaders meenen
Die heylighe gheest hielt met accoort
Ons isser een vruchte af comen voort
Al weenen
Sijn gracie moet hi ons verleenen
3.
Dit edel saet/ van hoger aert
Te bethleem in een huysken quaet
Lach op die aerde beneden
Twee beesten hielen met hem staet
Ende verwermden ons toeuerlaet
Sijn leden
Die godheyt was al te vreden
4.
Die maecht verclaert/ ende hooch vermaert
Lach. xl. daghen onbeswaert
Als ander vrouwen deden.
Het was den heydenen gheopenbaert
Sij haesten hen te bethleem waert
Ter steden
Met grooter waerdicheden.
5.
O maget reyn/ o edel greyn
Ghi sijt ons hulpe ons troost || alleyn
Ic bid v staet ons in staden
Ghi sijt den sondaren int ghemeyn
Een vol vat dat daer is certeyn
| |
[pagina 32]
| |
Gheladen
Vol godlijcker ghenaden
6.
O rosegaert/ van God bewaert
V gratie is geopenbaert
In ons tot menigen stonden
Want als die sicl ter pinen vaert
Bidt ghi daer vore/ si wort ghespaert
Van wonden
Dat wil ick v oorconden.
7.
O suuer maecht/ daert licht wt daecht
V groot ootmoet heeft God behaecht
Daer om bistu vercoren
Adams sonden heeft hi beclaecht
Die van v wert onuersaecht
Gheboren
Om tschaep dat was verloren
8.
Nu vrolijc singt/ ende sijns ghedinct
Dese vruecht ons alle vruechde in bringt
Die moeder bleef maget fine
God die heere diet al omringt
Wi bidden hem dat hi onser ghedinct
In die vre
Die swaer sal sijn ende suere.
|
|