Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wijse.1.
GHi mannen ende vrouwen
Die op der werelt sijt
Wildy v siele behouwen
Ende beteren uwen tijt
Wildy den viant mincken
Die ons altoos volcht na
Hebt altijt in v ghedincken
Den naem van Maria
2.
Maria is so soete.
Ende so wel ghenaemt
Datse die enghelen groeten
Also haer wel betaemt
Het is die Coninghinne
Die God zijn bootschap sant
Vol gracien ende vol minnen
Maria is sy bekant. ||
3.
Des heylighen kersnachte
Wilde hy gheboren sijn
Van haer die ons brachte
Den hemelschen Coninc sijn
Sonder wee oft smerte.
In maechdelijcker vruecht
Nv louen wi met herte
Maria die suyuer iuecht
4.
Bi des enghels saluyten
Dat sy Iesum ontsinck
Wert die viant te buyten
Van ons die ons beuinck
Het sant hem God die vader
Al in Marien lijf
Wi dancken alle gader
Maria dat reyne wijf
5.
Die negen engelsce chooren
Die salighe Seraphin
Altoos sonder verhooren
Louen met herten sijn
Die soete suyuer name
Die elc met herten dient
Die Gode wel is bequame
Maria des menschen vrient
6.
Maria is die vlamme
Diet Paradijs verlicht.
Maria sonder blame
Vol gracien is ghesticht
Si is die tresoriere
Van gracien dats certeyn
Met loue willen wy vercieren
Maria alle ghemeyn
| |
[pagina 28]
| |
7.
So wie dat in dit leuen.
Mariam eere doet
Si en sal hem niet begheuen
Al yst dat hi misdoet
Gracie salhi vercrighen
Als dede Theophylus.
Hi en wilde dat lof niet swighen.
Marie der moeder van Iesus
8.
Die Mariam can eeren
Ende dienen met herten geheel
Si sal hem impetreren
Van gracien sulck ghedeel.
Dat hi niet en sal moghen
Verdoemt zijn na zijn doot
Nv laet ons allen louen
Mariam wi hebbens noot.
9.
Maria draecht die croone
Na Iesus haer lieue kint
Si salt hem waerlijcx loonen
Die haer met herten mint
Nv bidden wi alle ghemeene
Mariam die suyver iuecht
Dat sy ons verleene
Haer gracie ende haer duecht.
|
|