Een devoot ende profitelyck boecxken

N^o. VI.aant.

ℂ Op die selue wise.

1.
Nv laet ons vrolijc singen
Een liedeken ter eeren van haer
Maria met haren kinde
Ick woude ic bi haer waer
So waer mijn herte in rusten
Dat nu lijdt pine swaer
Tsceyden en sou mi niet lusten
Al waer ick daer duysent iaer.
2.
Mijn herte leyt gheuangen
Van minnen seer beswaert
Mi mach wel seer verlanghen
Tot minen lieue waert
Bi hem en is gheen qualen
Maer hier is menich seer
Woude hi my bi hem halen
So en truerde ick nemmermeer
3.
Siele ghi moet verbeyden
Noch eenen cleynen termijn
Alsijn wij nu ghescheyden
Ten sal niet langhe sijn
Ick sal v corteliken
Al in mijn rijcke ontfaen
Daer om strijdt blideliken
Het sal saen sijn ghedaen
4.
O lief van hooger minnen
Ick en can gheswighen niet. ||
Mijn herte dat iijdt van binnen
Ick claghe v mijn verdriet.
Die deruen dat fij minnen
Sijn dicwils feer beswaert
Ende ongherust van binnen
Het is der minnen aert.
5.
O siele laet v ghenoeghen
En maket gheen verdriet
Tot liden wilt v voeghen
Ick en sal v laten niet.
Maer blijft altoos ghestade
In mijnder minnen fijn
Dat yst dat ick v rade
Mijn goelijck dochterkijn
6.
Nu wil ick altoos draghen
In mijn herte bliden moet
Waer om so soude ick claghen
O heere ghi sijt soe soet
Ick hope aen v ghenaden
Al bistu bouen mi
V duecht sal mi beraden
O heere des betrou ick di.