Ars moriendi

[fol. 75v]

In wat groter pijnen datmen comet mit onrechtueerdighen goede leestmen een gruwelick exempel

§ Exempel

HEt was een rijc man die veel gheldes ende goets bij een verghaedert hadde. ende was zeer rijck nae der werelt te spreeken. Mer dit goet hadde hi mit onrechtueerdicheyden ghecreghen ende myt woeckeren hadde hijt vanden menschen vercreghen ¶ Deze man sterf nae een wijl tijdes eenen onsaelighen doot. Ende hi hadde twee sonen. de een waert een gheestelick man. ende ghaf omme gods wille ouer al zijns vaders rijcdommen ende ghenck in onser lieuer vrouwen oerden. Die ander sone besat zijns vaders goet ende zijn rijcdomme die hi mit woeckeren ende mit onrechtueerdicheyt gewonnen hadde. Ende doe die waerlicke sone aldus in dit onrechtueerdige goet bleef sitten. berispede hem zijn broeder dicke ende menichwerue ende seyde hij moste dat onrechtueerdighe goet weder omme geuen den ghenen daert zijn vader mit onrechte af ghewonnen hadde. oft hij en mochte nummermeer int hemelrike comen. Die geestelike man wist wel dat zijn vader dat goet mit onrechte hadde ghewonnen ende daer omme berispeden hij sinen broeder op dat hi omme des onrechtueerdighen goets wille niet verdomet en soude werden. Mer die ander broeder en achte des niet. ende en wolde dat onrechtueerdighe goet nyet weder gheuen ende bleef aldus hier in sitten

§ Doe gheboerde dat hij sterf ende volghede sinen vader. Die gheestelike man zijn broeder badt gode oetmoedelick ende deuotelick dat hi hem tonen wolde hoe dat mit sinen vader ende mit sinen broeder wezen mochte.

§ Cortelick daer nae waert hij gheuoert. daer hi enen vlammighen putte sach wt welcken si beyde op quamen. ende si hadden groten hat ende nijt op malcanderen. ende die vader sprack tot sinen sone. Vermaledijt bistu sone want om dijnen wille wan ick dit goet. daer ick ewelick omme verdoemt bin. want ic begheerde v rijck te maken. ende dat heeft mij dus iamerlick bedroghen.

§ Doe sprack die sone weeder omme tot sinen vader segghende. Vermaledijt bistu vader. want haddestu mi dijn onrechtueerdighe goet niet aen gheeruet. ick waer behouden ghebleuen ende ick en soude in dese onsprekelike pine niet ghecomen hebben. ¶ Doe dit die gheestelike man ghesien hadde quam hi weder tot hem seluen ende danckede ende loueden gode dat hi hem beschermet hadde voer die onlijdelike pijne die hi ghesien had. ende daer zijn vader ende zijn broeder alsoe iamerlicken vanden wreden duuelen in gepinicht worden sonder enighe barmherticheyt.