§ Hoe goet dattet is datmen die moeder godes dient ende aenroept ende hoe dat si enen mensche bijstaet in zijnre noot. leestmen een exempel..
MEn leest inder vader boeken datter was een paer volckes ghebonden in die heilighe echstap. Ende die man leuede qualiken in ouerspel. ende dat wijf leueden doechdeliken. si plach horen man dicke te berispen van zijnder quaetheyt ende hadde gheern ghesien dat hi hem ghebetert hadde. mer hi en woldes niet doen. ende brocht hoerre beyder goet toe in ouerspel dat si arm worden soe dat si van noden aen nam eens ridders kint te op te voeden datmen omme hoer doghet aen hoer bestade want zij bekent was voer een goede vrouwe
Ende si leuede horen man veel te langhe. ende hij hadde alte gheerne hoer quijt geweest. daer omme visierde hi enen quaden raet hoe dat hi des ridders kint heimelick woude doden. Ende doe zijn wijf wt den huse was stack hij dat kindeken doot. want hi meende men soudes op hem niet vermoeden. Doe dat wijf te huus quam ende dat kint doet vant. doe dreef si soe groten iamer dattet alle dat volcke op die strate vernam. Doe worde si gheuanghen ende waert voer dat gerichte ghebracht ende waert veroerdelt datmense leuendich soude grauen. ¶ Ende doemense te gherichte waert leyden sloech si hoer oghen op inden hemel. ende sprack mit bitteren tranen. ¶ O maria want ghi alle bedroefde herten troestet daer omme comt mi te hulpen wanttu wel weetste dat ic van dese sake ontschuldich bin. ¶ Ende doe si dit gheseyt had. quam daer een scone vrouwe ende hadde een cleyn kint op horen arm. ende sprack den richter aldus toe. ¶ Ghi hebbet dit wijf veroerdelt totter doot. des si ontschuldich is Mer gaet weder omme to der dingbanck, ende wat v dit kint doen heet dat doet. Die richter dede dat. ende dat kint sprack totten richter. doet het kint halen datmen seyt dat deze vrouwe ghedoot heuet. ¶ Ende doet quam sprack dat leuendighe kint totten doden kinde. Ic ghebiede di van godes weghen dattu seggheste of dit wijf di ghedoot heft Dat dode kint antwoerde. neen. Soe ghebiede ick di dattu den ghenen wijst die di ghedoot heuet. Alte hantes quam dat kint totten man diet ghedoot hadde Doe nam die die richter den man ende doden hem. ende dat onschuldighe wijf waert verlost vander doot. want dye ghebenedide moeder godes quam haer te hulpen in haerre noet
Auteursrechtvrij