Ars moriendi

§ Een exempel van enen riken man. die omme zijn oncuusheyt vanden duuelen in die helle ghetoghen waert

Exempel

INden lande van beyeren sterf een rijck man die op een slot woende dat den hertoghe van beyeren toe hoerde.

Ende op eenre nacht zoe waert dye borch daer zijn wijf op sliep alsoe zeer beuende. dat al die ghene verueert waren die op den huse waren. Die camer dore ghenc op daer dat wijf in lach. ende zij sach dat der een groet zwart gigant horen man onghenadelick in die camer stiet. ende doe si hem bekende ende sach datter hoer man was greep si enen moet ende si seyde to hem dat hi soude gaen sitten bi hoer op enen stoel. ende wantet cout was ende hij niet meer dan een hemde aen en hadde. so nam si horen mantel ende spreydenen omme sinen liue. op dat hi niet vercouden en soude. ende si vraghede hem nae sinen staet ende hoet mit hem was. Hij antwoerde hoer mit een droeffelick aensichte segghende. Och och ick moet nu ende altoes verdoemt wesen.

Tot desen woerden waert de vrouwe zeer droeuich ende seyde tot hem. Och wat ist dat ghi segghet. Pleghestu niet soe veel aelmissen toe gheuen omme goedes wille. en was v dore van uwen huyse den pelgerims ende anderen armen luden niet altoes open. Moghen v al dese goede wercken niet helpen.

Hi antwoerde ende seyde. si en moghen mij niet helpen omme daer mede tot den ewighen leuen te comen. Want doe ic deze goede wercken dede. doe was ick in doot zunden ende ick en stont niet in die liefte godes ende daer omme moet ick ewelick verdoemt wezen. want als ic den armen wat omme gods wille gaf dat dede ick meer om vanden menschen ghepresen te werden dan omme godes wille ¶ Ende doe si hem noch meer vraghen wolde. seyde hi. Tis mi ghegheuen dat ick v openbaren soude mer ick en mach hier niet toeuen. Want mijn leydesman die wrede duuel staet voer die dore ende wacht mij. Al waren al die bladen die aenden bomen zijn tonghen si en zouden nochtans mijne pijne nyet vut moghen spreken die ick ewelick sal moeten lijden.

§ Doe hij dit gheseyt hadde quam die duuel ende stiet hem onghenadelick ende bracht hem int afgront der hellen. ¶ Ende doe die duuel mit hem ewech voer. beuede dat slot oft omme gheuallen soude hebben.

§ Hier omme o vutuercoren mensche wanneer ghi doechdelike werken doet soe en doet niet als deze man dede. mer als ghi den armen mede deylt of ander goede doechden doet. zoe doetet alleen omme die liefte godes ende niet om vanden menschen ghepresen te werden want dan en zijn zij gode niet ontfanlic noch bequaem.