Ars moriendi

§ Hoe anxtelick dat god die gheestelike menschen plaghet die mit dese sunden besmet zijn leestmen een exempel

Exempel

IN enen cloester was een nonne die seer oncuusch was ende besmette mit dese onmanierlike sunde hoer oerden die si aen ghenomen hadde. Het gheboerde dat si een kint ontfenck. ende doe zij dat kint ontfanghen hadde versmoerden ende doden si dat kint also haest alst opter werelt quam. ¶ Ende hier nae leuede si menighen dach. ende si liet hoer duncken dat die sunde alsoe lelick was dat zijse niet biechten en dorste. ¶ Nu siet o wtuercoren menschen hoe gruwelicken dat het is datmen die sunden niet biechten en wil omme schaemten des priesters. o wat dwaser menschen zijn dit die aldus dencken. want si moghen alte vele lieuer hoer sunden biechten den priester. dan beschaemt te staen ten ionxten daghen. want hoe wel datmen die zunden hier verberghen mach. si sullen ten ionxten daghe nochtans gode ontdecket wesen ende al sinen heylighen ende allen menschen. hier omme biechtet al dattu weeste. op datstu niet en comeste in dese pijne daer in die nonne in ghecomen is ouermits dat si niet biechten en wolde

§ Ten laetsten doe die nonne aldus langhe gheleuet hadde. waert si sieck. ende doe si hoer biechte dede. soe biechte si al die sunden die si ghedaen hade. ende si en biechte niet van scheemte dat si een kint ghewonnen hadde. ende dat si dat ghedoet hadde. want si dochte quaem si weder op ende dat si niet en storue. soe soude si ewelick verschaemt hebben geweest. Ende daer omme liet si dese sunde onghebiecht ende sterf daer mede

§ Dese nonne hadde een nichte inden seluen cloester die seer innichlicken voer hoer plach te bidden. Doe si langhe tijt aldus voer hoer ghebeden hadde ende vele arbeyts omme horen wille ghedaen hadde. ten laetsten openbaerde si hoer sienlick ende hadde een cleyn kint in horen armen. dat anders niet en scheen dan oft een gloyende coel vuers hadde gheweest. ende seyde tot hoerre nichten dat si voer hoer niet meer bidden solde. want si waer ewelick ende vmmermeer verdoemet. ¶ Doe vraghede haer die nichte waer omme dat si verdoemt waer. ende wat die sake waer. ¶ Doe antwoerde die verdoemde siele ende seyde. Och Och. ick hadde een kint ghewonnen ende also vroe als dat kint van mi gheboren was soe doden ict heymelick ende deze sunde en wolde ick in mijnen leuen niet biechten omme schaemten wille. ende daer omme moet ick dit kint ewelick ende vmmermeer draghen inder helscher pijnen ende dit kint brandet alsoe onghenadelike seer dat ics v niet wtspreeken noch segghen en mach. zijn onghenadelijke

[fol. 69v]

heette sal mi in ewicheyden bernen