Ars moriendi

[fol. 70r]

¶ Men leest een gruwelick exempel. van enen cardinael van romen den die duuelen te gherichte voerden

§ Exempel

IN romen was een cardinael gheheten iordanus die weleer een monick hadde gheweest vander oerden van cistersium. Mer zijn quade leuen dat hi hadde doe hi cardenael was dat en ouerdroch mit der heyligher oerden niet. want al zijn leuen was hi seer gierich. ende hem dochte dat hi niet gheldes ghenoch vergaderen en mochte. hij was oeck mede seer oncuusch van leuen ¶ Dese cardenael hadde enen schriuer die gheheten was pandolphus. ende desen sende hi om een boetschap daer hi te doen hadde

Ende het gheuiel doe die schriuer onder weghen ghenck omme zijns heren boetschap te bewaeren. sterf dye cardenael Op die zelue vre dat hi sterf soe was dese knecht opten weghe ende het was een wenich des morghens voer daghe

Daer sach hi een alte iamerliken ongheuallighen schare van alderhande menschen. Ende si saten achter eers op beesten verkeert ende hadden hoer aensichten ghekeert totten sterten. ende den rugghe tot den hoefde der beesten daer si op saten. Doe die knecht dit sach. begonde hem te gruwelen. Nae dese ongheualliger scharen quam dese cardenael die gestoruen was nae gaende beruoets ghecleet mit eenre cucullen. ende hi hadde twe duuelen de hem leyden daer hi tusschen hem tween ghenck. ¶ Doe die knecht dit sach was hi alsoe seer verueert. dat hij bijnae in ommachten gheuallen was. Doe die cardenaele aldus voerbij sinen knecht gheleyt waert. riep hi mit eenre iamerliker stemmen totten knechte segghende. Pandolphe. pandolphe. pandolphe. Die knecht bleef staen ende sach omme. ende verherde hem een wenich ende seyde. Wat roepstu. ende wie bistu

Hi antwoerde. Ick bin iordanus dijn here. ende ick bin ghestoruen. Die clerck vraghede hem waer salmen v brenghen. Doe antwoerde die cardenael ende seyde Ick moet comen voer dye rechter hant xpristi ende ontfanghen daer die sentencie nae minen wercken. Doe vraghede hem die clerck ende seyde. Weetstu wel hoet v daer gaen sal. Hij antwoerde ende seyde Ick en wetes niet hoe dat mij daer sal gaen. god wetet. Mer wanneer dat ick daer come soe sal sinte Peter reden gheuen voer mij dat ick cardenael gheweest hebbe. ende sinte Benedictus sal reden voer mij gheuen dat ick zijn monick gheweest hebbe. moghen si mi dan verantwoerden soe sal ick tot ghenaden comen. mer moghen si mij niet verantwoerden soe moet ic ewelic ende vmmer meer verdoemt wesen. ¶ Doe hi dit gheseyt hadde verscheen hi alte hantes ende die knecht en sach niet waer hij bleef Hij quam te romen ende vernam dat zijn here in die selue vre ghestoruen was do hi dit visioen ghesien hadde

[fol. 70v]

¶ O laci dat was een quaet teyken. dat hi vanden wreden bozen duuelen gheleyt waert ende dat die heylige enghelen daer niet bi en waren. tis te sorghen dat hi ewelick verdoemt moet wezen.