§ Die temptacie des duuels vander vermetenheyt.
DIe vijfste temptacie des duuels is vermetenheyt Als die duuel den siecken mensce nyet brengen en mach van dat heylighe gheloue. noch in wanhope. noch ock in gierigheyt. noch in onlijdsaemheyt. dan becoert hi den mensche in vermetenheyt. opdat hem die siecke mensche sal laten duncken dat hi perfect is. ende dat hy veel doechden gedaen heuet Dit zijn die smekelicke woerden des duuels segghende. O hoe vast hebt ghi gheweest in u gheloue. O hoe sterck hebbestu geweest in uwen hope. Ende hoe goedertieren hebstu in dijnen lijden gheweest.
Ende hoe veel doechden hebstu ghedaen binnen dijnen leuen. ¶ Ghij moghet v wel verbliden. want ghi en zijt niet gelijc anderen menschen die vele quaedes ghedaen hebben. ende nochtans zijn si te hemel gheuaren mit enen suchten. daer omme is v god zijn rijcke sculdich. want du hebste hem ghetrouwelick ghedient daer omme salstu ontfanghen de crone des ewighen leuens. du bist meerre genoechten ende blijschappen verwachtende dan die ghene dat sundighe menschen gheweest hebben
§ Bij desen ende anderen ghelijcken. tempteert die duuel den siecken mensce op dat hi den mensche alsoe mach brenghen totter ewigher verdoemenissen.
§ Het is te weten dat deze zunde zeer te schuwen is. want wanneer een mensche hem aldus laet duncken dat hi dat hemelrike weerdich is te besitten. so is alle zijne doechde verwandelt in boesheyt Want dit is bewesen inden heylighen euangelio. daer aldus gheschreuen staet Twee menschen beden inden tempel. die een was een pharizeus ende die ander was een publicaen. Die pharizeus verheffede hem seluen segghende. O god ick bin goet ende rechtueerdich. ick en bin niet als ander zunders. Die publicaen lach achter in die kercke. ende sloech zijne borst segghende. O here ick en bin niet weerdich dat ick v mit minen zundighen oghen aensien sal. Mer segt alleen een woert ende mijn siel sal ghesont werden Doe seyde ons here totten publicaen. dijn sunden zijn di vergheuen. Ende des phariseus vermetenheyt verdoemde hem
§ Hier omme en sal de siecke mensche hem seluen niet verheffen noch hi en sal hem niet laten duncken dat hij beter is dan ander sundighe menschen. mer hij sal zijn verdienste ende zijn liden setten in die ontfermhertigheyt godes Want ouermits verheffinghe waert lucifer mit sinen ghesellen gheworpen int afgront der hellen. ende alsoe veel als een mensce hem seluen hogher verheffet. also veel te dieper sal hem god vernederen
Auteursrechtvrij
