Ars moriendi

§ Die grote liefte die god tot den ghelouighen kersten menschen heuet.

DIt spreket god die almachtighe here. Dusent iaer te voren eer ic den mensche gheschapen ende ghemaeket hadde. soe hadde ick hem lief. ende ick dochte waer omme dat ic hem makede op dat hi mijn ghenoechlike hemelrijke besitten soude daer lucifer mit sinen enghelen dat is mit den houeerdighen duuelen wt ghestoten ende gheworpen worden.

§ O mensche nu weest verstandel ende ghedencket hoe grote ghenoechte dat god tot den mensche hadde eer dat hij hem make. ende ghedenck noch meerre liefte die god tot den menschen hadde want doe hij den mensce ghemaect ende gheformeert hadde nae sinen eyghenen beelde. dat was adam ende eua. ende doe si dat ghebot godes ghebroken hadden daer wij ewelick omme verdoemt souden hebben gheweest. Doe hadde god noch meerre liefte tot den menscen. want hij seynde sinen enighen sone wten throne zijnre godliker moghentheyt omme den mensche toe verloessen vander ewigher doot. want hij cost ons mit zijnen preciosen duerberen bloede. ende hi verlosten ons mit sinen bitteren doot want eer god sinen ghebenediden sone neder seynde. soe en mocht gheen mensche opter werlt soe heylichlicken leuen hij en moste in die helle comen

§ O mensche dese onsprekelike liefte heeft god tot den menschen ghehad op dat si mit hem ewelick mochten wesen in ontsprekeliker vrouden ende ghenoechten. Hier omme o wtuercoren mensche gaet nu in v eyghen consciencie ende besiet oft niet wel reden en is dat ghi een wenich pijnen ende verdriets lijdet om den ghenen die aldus groete liefte tot v ghehadt heuet. ende die sinen enighen sone also iamerlick heeft laten passyen ende martelijen omme uwen wille. ende hoverduldelick ende hoe oetmoedelick heuet die ghebenedide soen godes al zijne bitter passye ende sine martelije gheleden

§ Och wie is die mensche. die dese godlike liefte ouerdencket ende niet verduldich in sinen lijden en sonde wesen. Ic mene dat gheen verstandel mensche dit ouerdenken en mach hi moet verduldich lijden al dat hem toecomet.

§ Het waer een alte onuerstandelen mensche die dese liefte niet en achtede. want alle des menschen salicheyt hanghet aen die liefte godes

§ Och wat swaerre bitterre sentenci sal god gheuen ouer den mensche die op dese liefte niet gheacht en heuet. ende daer dat bloet ihesu xpristi an verloren is. Ende wat groter blijschap sal den ghenen wesen die god horen here lief ghehadt hebben. ende dye

[fol. 61v]

in horen liden verduldich gheweest hebben.

§ Iohannes crisostomus seyt. Is dastu des nachtes ende des daeghes ouerdenckeste danich dastu wezen salste inder ewigher glorien der heyligen

Ofte hoe danich sal wezen die verdoemenisse der ongherechtigher ende der zunderen. Soe moestu van nodes weghen omme anxtes wille der pijnen verueert werden ende gaen vanden quaden

Ofte omme begheerten der glorien haesten tot den goeden wercken.

§ Ende ist datstu alle daghen denckeste welcke die gherechticheyt godes is. ende wat zij haer ende si lief heuet. soe sal die gherechticheit v leyden inden weghe der ghebenedider mensche. Want die gherechticheyt vliet ende schuwet den ghenen de hoer hatet. ende si volghet den ghenen die hoer minnen. ¶ Ende hier omme moeten wi reden gheuen te ionxten daghen. of wij die gherechticheyt nae gheuolghet hebben. of die ongherechtigheyt. ende hier omme alle die ghene die den rechten wech wanderen. dat zijn die ghene de verduldich in horen lijden gheweest hebben. Deze moghen vromelicken ende coenlijcke spreeke tot den strenghen richter segghende. Here wi hebben uwen wille ghedaen wat zullen wi daer voer hebben. ¶ O wat ghenoechliker antwoert sal ons here sinen wtuercorenen vrienden toe spreken Ick segghe v voerwaer. Ghij die verduldich in uwen lijden gheweest hebbet comt nu ick sal v lonen mit mijnen wtuercoren heylighen inden ewighen leuen. ende v vroude sal alsoe groet wesen dat ghi die alre minste vroude voer dije meeste ghenoechte der werlt niet en soudeste willen gheuen. O wat groter ghenoechten sullen dan die wtuercoren vrienden xpristi hebben die omme sinen wille verduldich hebben gheweest in horen liden. O in wat groter blijschappen ende vrouden sal hoer pijne ende hoer liden dan verwandelt werden.