Ars moriendi
(1488)–Anoniem Ars moriendi–
Auteursrechtvrij§ ExempelDAer was een man die langhe tijt sieck gheleghen hadde ende onsprekelike grote pine gheleden hadde. Ten laetsten doe hi sach dat hi niet steruen en conde. begonde hi in onuerduldicheyt te comen ende seyde. ¶ O here hebbe ick niet ghenouch gheleden soe halet mij wt dezer pijnen ende laet mij in dat veghevuer ock wat liden. want siet mine pijne is alsoe groet dat ickse niet langher lijden en mach. § Wat gheschiede. doe die siecke mensche dit ghesproken hadde quam die enghel gods tot hem ende seyde. ¶ O vrient waer omme bistu onuerduldich. weest verduldich ende en murmureert niet want v pijne zal verwandelt werden in ontsprekeliker vrouden. ¶ Tot dessen woerden antwoerde die siecke mensce ende seyde. Ick hebbe in deze pine aldus langhe gheweest. ende ick en machse niet langher liden. daer omme bidde ick gode dat hij mi wt dezer pine verloessen wil ende laet mij int veghevuer voer mijn zunden ock wat penitencien doen. ¶ Doe antwoorde die enghel ende seyde. Och vrient biddet dat niet wanttu en weetste niet wattu biddeste § Ghij moet noch twe iaer in dezer pijne bliuen ende dan zalstu zonder veghevuer bi gode comen. of du moetste drie daeghen bernen int veghevuer. daer omme kiest nu Wilstu lieuer noch twee iaer in deze siecten bliuen. of wilstu lieuer drie daghen bernen int veghevuer. ¶ Doe dit die siecke man hoerde antwoerden hij seer blidelick ende seyde. Och soude ick nyet lieuer drie daghe pijnen lieden dan aldus noch twe iaer te liggen in dezer groter pinen. Ick wil alte veel lieuer drie daeghen int veghevuer bernen dan noch te bliuen twe iaer in deze groter pinen § Doe hij dit gheseyt hadde nam die enghel zijn siele wt den licham ende brochse in dat veghevuer ¶ Doe si daer omtrent een vuer in geweest hadde quam die enghel weder tot hoer inden veghevuer ende seyde. O vrient hoe ist met v. Die siele antwoerde ende seyde. Wie is daer. Doe seyde die enghel. Ic bin die ghene die v hier ghebracht heeft. ¶ Doe seyde die siele. Och du en bist gheen enghel. mer du bist een duuel. want waerstu die enghel godes du en soudeste mij dus iamerlick niet bedroghen hebben. Och du gheloueste mij dat ic niet langher int veghevuer en soude bernen dan drie daghen. ende ick hebbe hier wel hondert iaer gheleghen. ¶ Doe seyde die enghel. Lieue vrient hoe spreecstu aldus dwaesselick. Du en hebbeste noch mer een vuer hier gheweest Doe seyde die siele. Mach dat wezen. | |
[Folio 60v]
| |
Die enghel antwoerde. Iae. want in mi en is gheen loghentael gheuonden. § Doe seyde die siele. soe bidde ick v datstu mi weder in mijn lichaem brenghen wilste. want ick wil lieuer siecke ligghen ten ionxten daghe toe dan noch een vuer in deser pinen te wesen § Doe nam die enghel zijn siele. ende brachse weder omme tot sinen lichaem ende die siecke man vertelde allen menscen hoe onsprekelicke pijne dat hi int veghevuer gheleden hadde. § Hier omme o wtuercoren mensche weest verduldich in uwen liden. want ghij moghet alte grote pijne af legghen wanneer ghi verduldich in uwen lijden zijt. § Ten anderen mael merct oeck wat groter verduldicheyt dat gheweest is inden heylighen martelaren godes. In sinte Laurentius. sinte barbara sinte Katherina. Besiet oeck wat die ander martelaren gods omme xpristo gheleden hebben. ende wat groter tormenten dat hem aenghedaen is. |
|