Ars moriendi

[fol. 58v]

§ Wat groter blijschap ende vroude dat den ghebenediden sielen nae dezen leuen aenstaende is

GHij ionghe luden weest wacker ende lopet vuerichlick totten arbeide. want du bist verbeydende dat ewyghe goet wanneer du vromeliken arbeideste. Dat ewighe goet is haest ghenoemet. ende het gaet den quaden menschen haest wt den herte. Want als zijt horen noemen soe hebben zijt alte hantes vergheten ende si en achten noch en vraghen daer niet meer na. § Mer voerwaer die dat ewighe goet wel aenmercket ende verstaet wat dat is ende wat groter ghenoechte dattet is dat ewighe ghoet toe ghebruken. die en derues niet lichtelick wt der herten setten. ¶ Hier om willen wij dat ewighe goet verdienen. soe en mach ons ghene tribulacie noch ghene becummernisse daer af trecken. daer omme strijt vromelicke ende weest onuerueert want die tijt is cort die zegheuechtinghe is eerlick. ende dat loen is ewich.

§ En laet u een wenich arbeyds niet verdrieten. want alsmen moede is ghearbeyt ende datmen dan een goet loen ontfanghen mach. soe is den arbeyt onuerdrietelick. ¶ Hier omme arbeydet vromelick want dan loen datstu daer voer ontfanghen sulste dat en zal gheen ghelikenisse hebben bi dit eertsche loen

Want du sulste noch segghen gheliker wijs als daer gheschreuen staet. ¶ Een wenich hebbe ick ghearbeyt ende dat ghenoechlike loen hebbe ick daer voer ontfanghen. Want al die dropelen zwetes die ghi inden arbeyde zweet omme onsen lieuen here. ende al die voetstappen die ghi gaet omme godes wille die werden vanden enghel ghescreuen. § Ende al u lijden ende verdriet dat ghi om godes wille verduldelick lijdet dat brenghet die heylighe enghel voer die oghen des almachtighen godes. § Leert duken zwighen ende verdraghen. ende laet ouer v gaen. soe moghestu dat hemelrijcke verdienen. ende soe moghestu altoes vrolick van herten wezen. ¶ Clymacus seyt. O du mijn sone niet veel iaren en salstu arbeiden du en sulste in di beuinden salijghe roste des oueruloedighen vredes is datstu die gheheeliken ouer gheueste inden beghinne dijnre bekeringhe tot alre nederheyt ende versmaetheyt.

§ O mensche dit is ons een alte schone lere hoe dat wi ons seluen cleyn ende oetmoedich achten sullen. want anders en is ons verdienst niet. ¶ Hier van staet ghescreuen in dat heylighe euangelio. Ouermits homoedicheyt ende verheffinge en mach een mensche god niet dienen. Mer als een mensche hem oetmoedich maket soe en ontsiet hi hem niet te liden omme godes wille wat hem to comen mach¶ Die heylighe man sinte Bernardus seyt. Wie is die mensce die arbeyt ende verdriet zwaer duncket te wesen. ende ouerdencket die passye ende die martelije ons heeren ihesu xpristi. wat hi pinen gheleden heuet. ¶ Voerwaer

[fol. 59r]

niemant. want die dit wel ouerdenct. die duncket alte mael zoete wezen wat hi omme godes wille liden mach. ende in gheenre siecten noch in gheenre pinen en is hij onuerduldich

¶ Item mit also veel stralen schiet de mensche den bosen gheeste als hi menyghe goede begheerte heuet tot lijdsaemheyt zijnre pinen. ende alzoe dicke als hij hem veroetmoedighet. Want die quaede duuel schuut meer die doechden dan dat vuer want die duuel is voer dat vuer niet verueert. mer waer godlijcke ghedachten zijn daer en mach die duuel niet regneren. ¶ Item bekenden die mensche dat grote loen dat hem ghegeuen zal werden voer die alre minste doghede die hi vut rechter lieften doet. hij en soude niet segghen dat enich liden ofte verdriet zwaer weer. Want voerware. waer al die werlt roet gout. ende dat een mensche daer een heere ouer wezen mocht so en soude dat gout ende die grote rijcdomme niet te ghelijcken wezen dat dusenste deel bi dat loen dat een mensce hebben sal van gode voer die alder minste doechde dye vut rechter lieften ende minnen gheschiet.

¶ Item ten is gheen dinck dat den mensche alsoe seer verenighet mit gode. ende trecket tot doechden als goede begerende liefte tot gode ende heilighe gedachten. want als een mensche ghoede ghedachten heuet dat is een teyken dat die duuel gheen becoringhe inden mensche ghebracht en heuet want wanneer een mensche godlijcke dinghen in zijn herte heuet ende ouerdencket die passye ende dat liden ons heren ihesu xpristi soe en mach die duuel in des menschen herte niet nestelen. ¶ Men leest vanden heylighen vader sinte Francisco dat hi ouermits sinen goeden heylighen ghedachten daer toe was ghecomen dat hi dick ende menichwerue mit gode alsoe vriendelic te spreken plach mit sinen ghebeden. als die een vrient totten anderen sprect mit worden. ¶ Hier omme o lieue mensche en latet vmmers gheen quade ghedachten in v herte nestelen. want die duuel en woent nerghens lieuer dan in een herte dat quade ghedachten in heuet. Ende daer omme ist van groten noden datmen den siecken mensche altoes dat lijden ons heren ihesu xpristi voer seyt. opdat hi dat in zijn herte prentet. want die duuel bedrieghet enen siecken mensche veel lieuer ende brenghet hem tot quaden ghedachten. dan hy den ghesonde doet. Want hi dencket die siecke mach hem te hantes ontgaen ende comen wt sinen handen ende daer om is hi seer neerstich den siecken mensche te bedrieghen. Want hi dencket als hi den siecken mensche bedroghen heeft die te hantes steruen sal. soe comt hi noch vroe ghenoch omme den ghesonden mensche te becoren ende te bedrieghen.