Ars moriendi

§ Van enen goeden deuoten monick die gheheten was zegher. welkes siele ons liefvrouwe ontfenck

DAer was oec in een cloesteer een monick gheheten zegher die seer ionck van iaren was die grote liefte hadde omme zijn oerden te bewaren. Hij castijde zijn lichaem also met penitenci en dat alle die broeders een exempel der doechden aen hem namen ¶ Mer onder al dezen doechden. zoe hadde hi een seer grote doechde onder hem. dat was hi diende altoes die moeder ons heeren mit groter innicheyt ende bracht oeck die ander broeders daer to dat si maria de moeder goedes oeck dienen zouden

¶ Ende doe die tijt quam dat hem god ende zijn ghebenedide moeder lonen wolden den godliken dienste die hij hem gedaen hadde soe waert hi sieck ¶ Nu siet een wonderlick dinck wat god verhenghet. Daer was een conueers inden seluen cloester die alsoe heylighen man was dat hem god dick ende menich werue heymelicke dinghen te verstaen gaf. Hi lach in zijn celle. ende hem dochte dat die ratel gheslaghen waert alsmen pleech toe doen wanneer daer yemant sterft. ende hi ghinck in dat sieck huus op dat hi zijns broeders eynde mochte helpen bewaren mit sinen ghebeden. ende het gheboerde hem te gaen doer een pallaes dat seer ghenoechlick ende schoen was ¶ Ende doe hi daer in was sach hi daer sitten een wonderlike schone vrouwe van onsprekeliker schoenheyt ende weerdicheyt die een claer blinckende aensicht hadde. ende haer clederen die waren witter dan die snee. ende hi sach dese scone vrouwe al neerstelic aen. ende hi meenden ten mochte niet wesen daer en most wat godlickes inder vrouwen wesen. die also vol scheen te wesen van godlijker gracien. ¶ Ende wt de godlike liefte soe greep hi een coenheyt. want hem dochte dat hoer gracie alsoe groet ende menichuoldich was dat si op hem nyet toernich en soude moghen werden. hij

[fol. 50v]

sprack der vrouwen toe ende seyde.

¶ Alre liefste vrouwe waer omme comestu hier in ons cloester. ende wat saken hebbestu hier te comen. want du weetste wel dattet den vrouwen niet toe en behoert in ons cloester te comen. Daer omme segghet mij alre schoenste vrouwe hoe bistu hier in ghecomen

§ Alte hants antwoerde die moeder godes segghende. Lieue broeder en laet v niet verwonderen dat ick hier in ghecomen bin. Want ick hebbe sonderlinghe saken hier te comen. ende ongheoerlouet en bin ick hier niet ghecomen. want ick bin daer omme ghecomen op dat ic dit huus ende mijn broeders die my deuotelick dienen visiteren mach.

¶ Doe si dit gheseyt hadde wolde die conueers noch meer teghen hoer spreken mer si verscheen alte hantes ende ghenck wt sinen oghen.

§ Niet langhe daer nae hoerde hi die ratel slaen. ende hi sach openbaerlicken dat dat godlike visioen waerachtich was dat hem god vertoent hadde. Hi ghinck in dat siecke huus ende vant sinen broeder aldus cranck ligghen die alte hantes enen salighen doot sterf ¶ Doe die voerghenoemde broeder zegher doot was. vertelde die conueers dat wonderlicke teyken dat hi ghesien hadde ende hoe ons lief vrouwe de hemelsche coninghinne sat ende verwachtede sine siele. Ende hi teghen hoer ghesproken hadde. Hier vut verstonden die broederen ghemeynlick dat die ghebenedyede moeder godes horen discipel mit vrouden ende mit blijschappen ontfenck. dye haer alle zijn leef daghe soe oetmoedelic ende deuotelick ghedient hadde

§ Deze selue broeder hadde oeck veel van sinen broederen daer toe ghebracht dat si oeck deuoteliken dienden ons lief vrouwe. ende daer omme ist wel toe merken dat hem ons lief vrouwe horen ghetrouwen dienste niet ongheloent en liete.

§ O mit wat vrolicheyden heuet si sine siele ontfanghen. wat ghenoechliker woerden heeft si hem toe ghesproken segghende. Comt mijn vutuercoren soen ontfanghet u loen dat ghi verdient hebbet. Du hebbest mi ende minen ghebenediden sone trouwelick ghedient daer omme sullen wi v lonen mit die croene der ewigher glorien.

§ Hier omme laet ons oeck god ende zijnre ghebenedider moeder maria dienen op dat zij in die vre ons doets onse siele ontfanghen wil. ende brenghense in dat ghenoechlike pallaes des ewighen leuens. Want voerwaer si en laet nye mant ongheloent die hoer dient. Daer omme is dat sake dat wi haer dienen sonder twiuel zij zal ons weder omme lonen mit die vrouden des ewighen leuens. ende si sal oeck bi ons comen in die vre ons doets ende beschermen ons voer die wrede duuelen op dat si aen ons siele niet hebben en moghen. Want waer die moeder gods teghenwoerdich is. daer zijn de duuels verwonnen ende si en hebben gheen macht den sieken mensce te bedrieghen