Ars moriendi

[fol. 51r]

Siet wat lijdet dese man pinen; Hoe wel heb ic en bedrogen

§ Die temptacie ende die becoringe des duuels van die onuerduldicheyt. ende van die onlijdsaemheyt.

[fol. 51v]

DIe vierde temptacie der duuelen is onuerduldicheyt ofte onlijdsaemheyt. daer die viant den mensce mede becoert ende tempteert. segghende. O mensche waer omme lijdestu dese zwaer pine die aldus onuerdrachlicke groet is. Wat heuestu gode misdaen. Mit rechte moghestu wederspannich wesen. Sietstu niet datstu al vergheten biste. Dijn vrienden moghen medelijden mit den monde mit v hebben. mer och lacij mit den herte dencken si dat si wel wolden dat si uwer quijt waren want het is hem omme v goet ghedaen. zy vraghen meer na dijn goet dan nae dijn leuen. ¶ Dit brenghet die duuel den sieken mensche int herte ende tempteert hem hier mede. op dat hi hem mach brengen in onuerduldicheyt ende in onlijdsamheit Want die duuel weet wel als hi den siecken mensche aldus bedroghen heuet so en mach die mensche mit sinen liden niet verdienen

§ Daer nae comt noch die duuel ende becoert ende tempteert den sieken mensche segghende aldus. O du mensche du hebste recht datstu murmureerste. want besiet hoe menighen zundigen mensche dat god tot ghenaden ontfanghen heuet die mit een wenich lidens ten ewighen leuen ghecomen zijn. ende ghij moet aldustanighe onghenadelike pijn liden. Iae menich mensche comt bi gode die niet meer dan een dach ofte min pijnen gheleden hebben. ende du moetste aldus langhe in dese grote pine ligghen wat heuestu gode meer misdaen dan die ander zundighe menschen. die hi alsoe corte pine heeft laten liden ende heefse gheringhe wt haer pine verlost daer hij di aldus langhe in laet ligghen.

¶ God en is ouer v niet soe barmhertich als hi aldust eenighen menschen gheweest heuet. want waer hi ouer dij alsoe barmhertich hi en soude v aldus langhe in deze onghenadighe pine niet laeten ligghen.

§ Mit aldustanighen becoringhen ende temptacien comt die quade valsche bedriegher op dat hi den siecken mensche tot hem trecken mach mit deze onuerduldicheyt. ¶ Mer och alre liefste mensche en ghelouet vmmers dezen quaden becoerre niet. want alle die schone woerden die hi v voorleghet dat doet hi omme v te bedrieghen op dat hij v siele mach brenghen in die ewighe verdoemenisse.

§ Ghelouet dat sinte pauwels seyt. daer aldus gheschreuen staet. O mensche danct ende louet gode. dat hi v lijden toe seynt. want hoe ghij meer pinen lidet omme gods wille so v loen groter ende menichuoudigher by gode wesen sal.