§ Datmen den menschen gheen quade exempelen gheuen en sal leestmen een gruwelick exempel
IN eenen dorpe was een onsalich quaet priester die zeer onkuusch was van leuen. ende bracht zijn tijt to mit drincken. mit dobbelen. mit dansen mit houeren ende mit veel ander ijdelheyden. ¶ Hi hadde een groet dorpe te regeren ende gaf hem aldustaenighen exempel in ondoechden ende in quaden werken ¶ Die menschen die inden dorpe wonede worden oeck quaet van leuen. ende worden iamerlick bedroghen mit dezen quaden priester Want wat si quaedes deden daer en berispede hem die priester niet in ghelikerwijs als hem toe behoerde. ende daer omme quamen si mit groten hopen in die helle. hadden si bi auonturen enen goeden man tot enen kerckhere ghehadt diese in horen zunden berispet ende ghestraffet hadden si zouden sommighe hoer leuen wel ghebetert hebben. Mer want die herde quaet was. daer omme dwaelden die schapen.
¶ Het gheuiel op een tijt dat dese quade priester haestelike sieck waert. ende sterf alsoe in zijnre boesheyt. ¶ Doe hi doot was brochten die duuelen sine siele in die ewighe verdoemenisse. Nu hoert een wonderlick dinck. Doe deze priester in die helle quam ende iamerlick vanden duuelen ghepinicht waert quamen daer na sine ondersaten de oec inder hellen waren mit roepen mit carmen. mit crijssen segghende.
Weest willecome o du vermaledide creatuer. O wat groter pine salstu nu lijden. want wi en moghen nu nummermeer op houden di te pinighen
¶ O valsche bedriegher. hoe iamerlic hebbestu ons bedroghen. haddestu ons een goet exempel ghegheuen wi en souden in dese grote pine niet ghecomen hebben Och och in wat zwaerre pinen hebstu ons ghebracht. Vermaledijt moet zijn die vre daer du in gheboren biste Want du bist een saeke onser ewigher verdoemenissen. ¶ Doe si dit gheseyt hadden liepen si toe ende sloeghen hem ende stieten hem ende sleepten hem ende toghen hem bij den hare ende ghebeerden oft rasende honden gheweest hadden. want si gebeerden of si hem verschoert souden hebben wanneer si op hielden van pinighen. soe quamen die wrede quade duuels ende deden hem noch meere pine aen. Nummermeer en lieten si hem rusten. mer altoes so pinichden si hem sonder enighe barmherticheyt.
¶ Hier is te weten dat van groten noden is als een mensche in sinen verscheyden leyt datmen dan bi hem brenge enen priester of een ander mensche de van goeden leuen is die den siecken mensce wat goedes voer segghen mach. op dat hem die siecke mensce niet en becommer mit des priesters quade leuen. Want die duuel brenghet den siecken mensche menijghe quade fantasie int herte. op dat hij godes vergheten sal.
Auteursrechtvrij