§ Dat goede ingheuen des heylighen engels teghen die temptacie des duuels vander gyericheyt.
ALlen menschen ist van noden dat zij afkeren hoer oren van dat quade ingheuen der duuelen vander hellen van der gyericheyt. Ende dat zy nauwe toehoren nae dat goede ingeuen des heylighen engels teghen deze quade temptacie des duuels Want die duuel spreyt zijn nette altoes wt omme den mensce te vanghen ende te brenghen in die ewighe verdoemenisse.
§ Het is oeck te weten dat dye duuel nummermeer af en laet den mensche te tempteren ende te becoren alsoe lange als die mensche leuet. Als die duuel den sieken mensce dan mit gyericheyt becoert ende ghetempteert heuet. soe comt die enghel gods ende troest den siecken mensce segghende. O mensche en wilt vmmer nu niet gyerich wezen. Hebbestu in dijn leuen gyerich gheweest. soe ist nu meer dan tijt dat ghij die gyericheyt wt dijn herte settet want ghi moet nu alte hantes steruen. Want ghi moet alte hans achterlaten alle dijn goet. iae al hadstu vergadert al die rijcdommen der werlt du mostese nu achter laten. Ende laetstu se niet willichlick achter so en mogestu nummermeer zalich werden ¶ Hier af sprect ons here int euangelio Ten si dat een mensche zijn goet achter laet omme minen wil hi en mach mijn discipel niet werden. Ende noch seyt hi voert die niet achter en liete zijn huus ende hof zijn wijf ende kinderen zijn moeder ende vader ende zijn eyghen lichaem omme minen wille die en mach in mijn rijcke niet comen. ¶ O mensche en dencket vmmer op gheen titelick goet. mer ghedencke hoe ons here ihesus xpristus hanghende aenden cruce omme dinen wille arm van eertschen goede is gheworden ende hoe hi achter gelaten heeft sine ghebenedide moeder maria Ghedenck wat die heyligen gods achter ghelaten hebben. hoe si hoer grote goet ende hoer ouders achter ghelaten hebben omme xpristo te dienen ende na te volghen. En ghedenck dijnre vrienden noch dijnre magehen niet. becummert v niet vorder mit tijtliken ghoede. dan maeket rechtueerdich ende gheuet weder omme dijn goet datstu mit onrechtuerdicheit hebbeste ghecreghen. ende dan en dencket niet meer op dijn eertsche goet. ende ouerdencket die passy ons heren ihesu xpristi wat god omme uwen wil geleden heuet ende wat die lieue sancten ende sanctinnen omme godes wil gheleden hebben. Dancket ende louet gode dat hij v oeck liden ende verdriet toe gheseynt heuet op dat ghi dat hemelrike mit uwen liden oeck verdienen moghet. Mer o lieue mensche weest vmmer verduldich in uwen liden. Want liden sonder verduldicheyt en machmen dat hemelrike niet mede verdienen.
Auteursrechtvrij
