Ars moriendi

[fol. 42v]

§ Een gruwelick exempel vanden hertoghe van cyringien.

Exempel.

MI is gheseyt van waerachtighen goeden menschen een wonderlike dinck dat ick niet zwijghen en mach. Bijden berch gyber wanderde sommige menschen mit malcanderen ende si hoerden een gruwelicke stemme roepende ende seggende aldus. Bereyt haestelic een groet vuer van siedende peck ende van bernende zweuel ¶ Die luden worden zeer beanxtet ende hem gruwelde zeer om dat si die stemme alsoe gruwelijck hoerden roepen ¶ De stemme zweech doe een wenich ende hoer en antworden nyemant. ¶ Alte hantes begonde si noch eens te roepen. maecket een groet vuer Ende doe hoer noch niemant en antworde riep si derdewerf mit luder stemmen daer zijt alle horen mochten die daer voerbij ghingen. Maect haestelic een groet vuer sonder enich vertreck alsoe gloyende heet als ghijt maken moecht

¶ Doe die stemme dit gheroepen hadde antwoerde daer een ander stemme. Wie sal ick dit vuer maken. Die luden hoerden die stemme wel mer zij en sagen niemant daer omme worden si zeer verueert. Doe seyde die stemme. Weetstu niet dat ons goede vrient. die hertoghe van cyringien op comende weghen is. Hi heeft ons trouwelick ghedient daer omme sullen wi hem lonen mit die ewighe verdoemenisse

§ Doe die stemme dit gheseyt hadde en hoerden die luden niet meer roepen. Si schreuen den dach ende die vre ende schreuen eenen brief aen den coninck vrederick. wat si ghehoert hadden. ende lieten hem vraghen of in sinen lande enighe hertoge van cyringia ghestoruen waer

Doe waert hem openbaerlick te kennen ghegheuen dat die selue hertoghe op dye vre ende opten seluen dach ghestoruen was doe si dit wonderlicke teyken ghehoert hadden. Hem waert oeck gheseyt. dat dese selue hertoghe een quaet wreet tyran in zijnen leuen hadde gheweest. ende hoe hi edel ende onedel arm maecte ende hoer goet af roefde. Hij was oec ghegaen van dat heylighe kerste gheloue. Hi en hadde gheen kinderen nochtans was hi sunderlinghe gyerich ende neerstich om grote scat ende costelijcke rijcdommen bij malcanderen te gaderen.

§ Doe dese tyran sieck lach ende steruen soude liet hi alle sinen scat ende zijn costelike silueren ende gulden vaten voer hem brenghen ende gheboet datmense altemael solde smelten ende ghietense tot enen stucke Ende als hem gheuraghet waert waer om dat hi dat dede antwoerde hi ende seyde. Mijn vrienden verlanghet seer na mijnre doot op dat si mijn goet mijn rijcdomme moghen besitten. ende daer om wil ic mijn siluer ende mijn gout smelten op dat zijt niet mit vreden mit malcanderen deylen en moghen. ende op dat si malcanderen door steken ende slaen moghen. want alst in enen stuck ghesmouten is soe en

[fol. 43r]

sullen zijt mit malcanderen mit vreden niet moghen deylen.

§ Nu besiet die boesheyt deses quaets tyrans hi hadde in zijn leuen grote quaetheyt ende twijdrachticheit onder den volke ghemaect mer noch en was hem dit niet ghenoch hi moste oeck noch twidrachte in zijnre doot maken op dat sine quaetheyt ende sine verwoetheyt toe groter ende te menichuoldigher ghebreyt mochte werden.

¶ Mer wat gheschiede. Dese quade tyran sterf mit aldustanighen quaeden opsette ende die wrede duuelen quamen in den huse schaterende ende lachende. ende namen die onsalighe siele ende brochtense in die ewighe verdoemenisse.

§ Doe si hem mit groten ghecrijs ende mit roepen in die helle ghebracht hadden setten si hem op enen stoele van gloyenden ijser ende namen peck ende zweuel ende mengheden dat mit helschen vuer ende sperden hem zijnen mont mit machten op. ende ghoten desen helschen dranck in sinen mont ende riepen ende seyden hem schempeliken. ¶ O alre liefste vrient du hebbeste ons trouwelick ghedient. ende daer omme hebben wi v desen costeliken dranck bereyt. want waerstu onse goede vrient niet. du en mochste dezen dranck van ons niet crighen. drincket daer omme ende vercoelt v hier mede wij sien wel dat ghi seer moede zijt Mer en laet v niet verlanghen. wi sullen v alte hantes een costelike maeltijt bereyden. daer wi v mede willecom heyten sullen O wee der onlideliker maeltijt

§ Als die duuelen dit gheseyt hadden namen si hem vanden gloyendel stoel. ende brochten hem aen een gloyende tafel ende brochten hem daer voer helsche draeken ende padden ende vuerighe slanghen ende seyden. ¶ O ghetrouwe vrient eet ende drincket ende maket v vrolick. Want siet alle dese costelike spise hebben wij omme uwen wille bereyt. Mer och leyder hem en luste na deser spise niet ende hi ende woude niet eten.

§ Doe quamen die vrede duuelen ende braken hem den mont op mit machten ende stieten hem mit crouwelen inden mont dese helsche draken ende die vuerighe slanghen mitten padden Ende doe si dit ghedaen hadden seyden si tot hem. Wtuercoren vrient laet v niet verlanghen wi sullen v alte hantes een ghenoechlick bat bereyden daer ghij in moghet baden. want wi sien dat ghij seer bezweet ende onreyn zijt op dat ghi v daer in reynighen ende claer maken moghet ¶ Ende doe namen si hem vander gloyender tafelen ende worpen hem in enen gloyenden siedende put. ende daer waert hi iamerlick in ghepinighet

§ O lieue mensche ouerdenct nu dat loen dat dese quade tyran die ewige verdoemenisse voer zijn boesheyt ghecregen heuet. Mer en hebbet vmmer in die vre dijns doots aldustanighen opset niet. als dese quade hertoghe hadde. op dat ghi niet mit hem en comt in die ewighe pine. Mer al hebstu alle dijn leuen quaet gedaen ende begeerstu in de vre dijns doets genade god sal dijnre ontfermen.