Ars moriendi

[fol. 42r]

§ Men leest hier af een suuerlic exempel daer een mensche wel op dencken ende pensen mach ende versmaden alle die rijcdommen deser werlt

§ Exempel

Het was een machtich hertoge van burgondien die seer rijcke was van eertschen goede. Mer ock laci hij en mochtes niet mit hem nemen mer hi most alle zijn costelicheyt hier laten.

§ Dese hertoghe hadde enen soen de erfghenaem van zijns vaders goet zijn zoude. ¶ Ende het gheboerde dat desse hertoghe sterf ende zijn soen besat dat hertichdomme dat hem an ghestoruen was Doe waert die soen eens te rade mit sinen heren dat hi zijns vaders dode lichame brenghen wolde op een ander stede ende begrauent in een ander kercke.

Ende doe die kom dat is dat stenen graf op ghedaen was ende hi sinen doden vader daer in sach ligghen die mit costelijken cruden ghebalsomt was. soe sach hi een lelicke padde op zijns vaders monde sitten ende te beet ende cnaghede sine tonghe. ¶ Doe dit die hertoghe aensach waert hi seer verueert ende hem verwonderde seer hoe dat lelike beest inden graue ghecomen was. Hi dede seer cloeckelick als een cloeck man toe behoert. Hij sprack tot sinen ridderen ende knechten ende seyde. O quade bedrieghelike glorie deser werlt al hebbestu den vader bedroeghen du en salste den sone nochtans niet bedrieghen. Doe sprack hi tot sinen doden vader. O vader waer zijn nu dijn rijcdommen ende dijn costelike cleynaten. Waer is nu alle dine glorie die ghi te gebruken pleghet. Waer zijn nu dine lecker marcelen. O hoe mach dit nu zijn. dit lelike beeste cnaghet ende bijt alle dijne lichaem aen stucken. Moghen dine rijcdommen di nu niet beschermen. Moeghen dine ridderen ende dine knechten di nu niet te hulpen comen. daer du mede te striden ende te rouen plegheste. Ick en sal di niet naevolghen Want ick merke my en soude anders niet gheboren nae mijnre doot dan die nu gheboert is Iae al hadde ick vergadert alle die rijcdommen der werelt mi duncket si en souden mi niet helpen moghen

§ Daer nae gaf die hertoghe alle zijn lant ende zijn rijcdomme ouer om die liefte godes ende dienden onsen heren oetmoedelick ende deuotelick in een cloester. ¶ Al was hi machtich ende groet van gheboerte hi en begheerde daer omme nochtans die meeste onder den broeders niet te zijn Mer altoes begheerde hi die minste onder den broeders te zijn. ¶ Hier om o lieue mensche ouerdencket dese punten ende en wilt v herte vmmers op geen gyericheyt noch op rijcdommen setten Want als die ghyericheyt so dunct hem dat zijn herte nummermeer versadet werden en mach. Ende ouermits dese sunden brenghet die duuel veel menschen tot die helsche pine ende quelse iamerlick sonder enighe barmherticheyt.