§ Die wormen begheren dat vleysce inder eerden omme dat te verslinden.
TEn derden male o snode vleysce als dese twee hoer testament hebben dat is die vrienden dijn goet die duuel dijn siel. Daer na begheren die wormen inder eerden hoer testamente dat is dijne lichaem Want soe gheringhe als dijne siel vut den lichaem ghesceyden is. zoe salstu naket ghemaect worden. ende dijn cierheyt sal van di ghenomen worden ende dan salstu in een out slaeplaken gheleyt worden. Voert zoe moetstu van dijn sachte bedde gheslepet worden. ende men sal v op die herde plancken legghen dat moet dan v sachte bedde zijn..
Och dan sal een yeghelick van v vlyen ende het sal hem pine ende zwaer zijn v te sien
¶ O hoe sal dine soeticheyt dan verduustert zijn Die ghene die dijne gheselschappe pleghen te begheren die en begeren dijnre dan voertmeer niet. Want hoe soete ofte hoe minlick datstu in dijnen leuen gheweest hebbeste dan salstu gruwelick ende onsoete voerden menschen zijn. Want niemant en sal di dan begeren te cussen alsmen di te voren plach te doen. Ende niemant en sal oeck dijn gheselschap begheren mer een yeghelick sal u versmaden als du doot biste ¶ Soe salmen di in een huus besluten van seuen voeten. mer soe veel als een cussen onder dijn hoeft en salmen die niet mede gheuen mer eenen herden stroe wis dat sal dijn zachste cussen zijn. Daer na salstu in die eerde begrauen werden. ende men sal di haest vergheten. Ende dan en salmen op dij niet dencken. Mer dijne vrienden zullen dijn goet ghebruken. die duuelen dine siele. ende die wormen dijn vleysche. Ende gheen van dezen drien erfghenamen en souden begheren dat ghi leuede. Want een yeghelick is te vreden mit sinen testamente
§ O ghi houeerdighe menschen die nu opgheblasen biste mit groete houerdye ende mit hat ende nijt. oncuusch. gulsich. gyerich. traech tot gods dienste ende to doechden. mer altoes so bistu bereyt tot idelheyt ende tot quaden zunden. Wat batet datstu lecker gheweest hebbest alstu doot biste soe moetstu werden een spise der wormen. Want du salste alte han stincken als een aes Gheen dode beesten en stincken also qualiken als een doot mensche. Ende daer omme hoe die menschen leckerliker op deser werlt gheleft hebben ende dat vleysche vetter ghemestet hebben soe den wormen lieuer is die dat te rijten ende te cnaghen zullen.
¶ O wat mach die houeerdighe mensche denken. waer op mach hi houeerdich wesen. och weetstu niet onredelicke creatuere datstu nae dijnre doot anders niet en biste dan een stinckende spyse der wormen. die dijn stinckende vleys te cnaghen sullen
Auteursrechtvrij