Die temptacie des duuels vander gyericheyt.
GI sullen hier mercken die derde temptacie des duuels die welke is Auaricia. dat is Gyericheyt. Dese doet den waerlijken personen alte groten ouerlast. als dat die siecke mensche hem zeer becummert mit sinen tijtliken goede mit sinen wijue ende mit sinen kinderen vrienden ende maghen. Want daer die mensche in sinen leuen zijn sinne ende zijn liefte op gheset heeft daer becoert hem die duuel alre meest in de vre zijns doots op dat die mensche mit aldustanighe becommernisse gode vergheten mach. Dit zijn die woerden des duuels. O du keytijf du moeste nu achter laten alle dijn goet ende alle datstu opter werlt hebste. wijf ende kinder vrienden ende maghen ende alle ghenoechte salstu nu achter laten. Wat salstu nu doen mit alle dijnen groten goede. ¶ Nu ist tijt datstu dijn vrienden begaueste ende datstu dijn kinderen rijc makeste op dat si tot groter staet ende to groter eren comen moghen. En ghelouet niet datmen di seyt van dijn onrechtueerdighe ghoet dat ghi dat weder gheuen moet den ghenen die ghijt met onrecht af ghewonnen hebbet. en gheloues niet dat zij v wijs maken si lieghen ten is gene onrechtueerdich goet. Iae soudestu dat weder gheuen datmen di seyt dijn kinderen ende dijne vrienden souden des groet ghebreck hebben. Tis beter dat ghi dijne kinderen ende dijne vrienden rijc maket dan dat ghi der papen clappen geloeft. Wat willen si di segghen van dijn onrechtueerdighe goed ende datstu ghyerich biste. Sijn die papen niet soe ghyerich als du biste. Waert soe groete sunde als si di segghen zij en souden seluen niet gyerich zijn. ¶ Gheloues niet dat si di segghen ten is alsoe niet.
¶ Mit aldustanighen temptacien beroert die duuel den siecken mensche. op dat hi godes vergheten mach ende op dat hi zijn onrechtueerdige goet niet weder gheuen en sal. ¶ Want als die mensche mit onrechtueerdighen goede sterft. ende hi wel weet dattet onrechtueerdich is soe en mach hi nummermeer bi gode comen. Ende dit weet die duuel wel daer om tempteert hi den sieken mensche mit al dustanighe ghedachtenisse
¶ Hier salmen weten datmen den ghenen de op zijn doet bedde leyt niet inbrenghen en sal omme zijn vrienden ende maghen te begauen of daer op te dencken. Want die becommernisse zijnre siecten is hem ghenoch. ende hi en gehoeuet oeck anders nerghens op te dencken dan ho hi gode een bequaem siele mach offeren Want het is dick ghesien. dat hem dye siecke menschen alsoe seer mit horen vrenden becommerden dat si god ende alle zijn heylighen vergaten ende niet en achten.
Auteursrechtvrij
