Ars moriendi

[fol. 36v]

§ Van enen priester die de trompette vanden engel hoerde blasen ende hoe dat god die werlt wolde laten vergaen.

§ Exempel

BI claren valle was een pryester wilhelmus ghenoemt. ¶ Dese was alsoe goet van doechdelijcke werken dat hij die heymelicheyt godes sien mochte ¶ Op een tijt gheschiede dat hy quam voer gode inden geeste ende sach dat god sprack tot sinen engel. Blaest die trompette. Alte hantes was de engel ghehoersaem ende blies die trompette alsoe lude datment alle die werelt ouer horen mochte. ¶ Doe sprack god tot sinen.xij.apostelen. Comt ghi richters ick wil die vermaledide werlt veroerdelen Want si doen mi alsoe groten spijt Si zweren bi minen preciosen bloede dat ick omme horen wille vuytghestort heb. Si zweren oeck by minen ghebenediden wonden daer icse mede verlost hebbe vander ewiger doot. Si zweren bi al mijnen heylighen leden die ick omme horen wilde hebbe laten recken an die galghe des cruces Dese grote verwoetheyt ende beestelicheyt en wil ick vanden menscen niet langher lijden. mer ick wilse plagen mitter ewigher verdoemenissen

§ Die die heylighe apostelen dit hoerden worden si seer bedroeft ende vielen op horen bloeten knyen voer gode. ende seyden. O ghebenedide soen godes En late die werlt noch niet verghaen op dat die menschen inder werelt hoer sunden beteren moghen.

§ Hier op antwoerde god die here ende seyde.

§ Ick hebbe se langhe ghespaert ende ick en verneeme ghene beteringhe in hem. daer om wil icse laten smoren in horen sunden.

¶ Ten laetsten quam die ghebenedijde moeder gods maria ende viel op horen knyen ende toende hoer maechdelike borsten ende seyde. O mijn ghebenedide sone siet aen die borsten die ghi ghesoken hebt.. ende doer alle die liefte die ghi to mij draghet soe bidde ick v oetmoedelic als een moeder der barmhertigheyt datstu die werlt noch niet verordelen en wilste Want daer zijn sommighe menschen inder werlt die ons nacht ende dach dinen. hier omme bidde ick v mijn alre lieueste kint doer alle die droefenisse die mijn ionferlicke herte leet doe dijn ghebenedijde lichaem ghestrecket henck an die galge des cruces dat ghi mij niet weygheren en wilste.

§ Doe ons here dit hoerde waert hi mit barmhertigheyt beweghen ende seyde. O mijn alre liefste moeder ic heb v gheloeft alle dat ghi van mij begeret dat en sal ick v niet weygheren daer omme en mach ick v niet ongehoersam zijn. Ende alte hantes heeft god sinen groten toerne laten sincken ouermits de gebeden zijnre ghebenedider moeder

¶ O alre liefste mensce dient hier omme die moeder der barmhertigheyt. op dat si di mach versoenen mit horen ghebenediden sone wanneer ghij hem vertoernt hebbet mit uwen stinckenden quaden sunden. Want si is die ghene die v helpen mach