§ Een exempel van enen priester dye alsoe ontellike veel duuelen tot sinen lesten eynde quamen dat hise niet tellen en mocht
HEt was een priester van die premonstratensis oerde Dese was ouer dat meer ghetogen omme daer dat cruce te prediken ende doe starf hy daer
Nae zijn doot openbaerde hi sinen ghesellen ende seyde hem dat si vromelick prediken zouden Want si zouden daer een groet loen af ontfanghen. Doe vragede hem een van sinen ghesellen ende seyde
O mijn lieue broeder segget my in wat staet datstu biste ende wat v ghesciede do du van eertrike scheydeste
§ Die pryester seyde. Mijn lieue broeder dat sal ic v seggen. Doe ick sterf ende in minen laetsten eynde lach quam tot mij een ontellike schare der duuelen mit crouwelen. met langhen tanden ende riepen mit groeten crijssen ende seyden. ¶ Comt o ghij princen der duuelen ende ontfanghet dese siele. Si heeft ons lieuer ghedient. dan gode Want doe dese int lant quam prediken en dede hijs niet vut die liefte godes daer omme en sulstu daer geen loen af ontfanghen. mer ewelick salstu mit ghequellet werden.
§ Als si mi dus verueerlicken toe sproken begonden zij nae mi te grijpen of si mi schoren zouden Doe waert ic alsoe zeer beanxtet dat ic v dat niet vutspreken en mach
¶ Ick sach iamerlick omme. of daer yemant waer daer ick enighen troeste of bistant af crijghen mochte. Mer och laci ick en sach niemant comen.
§ Doe dochte ick Nu moet ick ewelick mit desen quaden duuels ghepinighet werden ¶ Doe ick aldus dochte riepen de duuelen mit luder stemmen. Comt laet ons desen keytijf mit ons nemen. want hij comt in mistroeste
§ Doe die duuels dit riepen. quam god die here mit zijnen ghebendiden cruce ende veriaghede al die duuels ende sprack tot mij. Com mijn wtuercoren soen nu sal ick v lonen datstu mi ghedient hebste ende datstu in mijnen dienste ghestoruen biste. ¶ Alte hantes doe ons here dit gheseyt hadde nam hi mijn siele vut des duuels handen. ende brochse in zijn ouerschone hemelrijcke. Ende nu heeft hi mi tot v gheseynt op dat ghi volstandich zult bliuen in sinen dienste ende dat cruce vromelick teghen de heyden prediken zulste
§ Doe vraeghede hem zijn mede broeder. wat pijnen dat hi voer zijn zunden liden moste. Die siele antwoorde. Ick en hebbe anders gene pijne gelede dan dat anxtelijcke schouwen der boser duuelen in minen laetsten eynde. Ende nochtans was mi dat also grote pijne dat nye mensche opter eerden alsulcke pijne en leet. Want men en mach v niet dat dusenste deel seggen ho verueerlick dattet is die anxtelicke aensichten des duuels aen te schouwen
§ Doe die siele dit gheseyt hadde verscheen si rechteuoert ende waert by gode ghebracht daer si ontfenck de crone der glorien.
Auteursrechtvrij