§ Dat goede ingheuen des engels teghen die temtatie des duuels Ende hoe die engel den siecken mensche inbrenget dat hi betrouwen sal in die ontfermherticheyt godes
GHij menschen merket hier dat goede ingheuen des heilighen engels teghen die disperacie ende die becoringhe des duuels Als die duuel den siecken mensche alsoe veer brenghet ouermidts sine quade becoringhe dat hi dencket. Siet mijn zunden zijn alsoe groet dat ick nummermeer genade van minen zunden vercrighen en mach. Dan comt die enghel godes ende troest den siecken mensce seggende aldus ¶ O mensche waer om wanhoepet ghi. Al waert datstu alle die moerden. dieften. ende dootslaghen gedaen hadt als dropelen waters ende zandes inder zee. Iae al haddestu alle dye zunden der werlt ghedaen ende nochtans niet ghebiecht en hadt ouermits die temptacie des duuels ende dat ghy alsoe cranc waert dat ghijse niet biechten mochste daer omme en sult ghi nochtans nyet wanhopen. Mer ghy sult dencken. O barmhertighe god ontfermt v mijnre. ende wilt my vergheuen dat ick aldus verherdet hebbe gheweest ende mijn sunden niet en hebbe willen biechten. lieue here weest mi barmhertich Want mocht ick spreken ick woude nu gheerne mijn zunden biechten ende het is mi bitterlicke leet dat mi die duuel aldus veer heeft gebracht dat ick aldus mistroestich hebbe gheweest. Als een mensce aldustanigen opset heuet iae hoe grote sunden dat hi tegen gode ghedaen heuet god sal nochtans zijnre ontfermen ende nemen hem te ghenaden ¶ Want dauid seyt inden psalter. Cor contritum et humiliatum deus non despicies Dat is te segghen. Een berouwich ende een oetmoedich herte en sal god niet versmaden.
§ Ezechiel die prophete seyt oec. In wat vre dat die mensce zuchtet voer zijn sunden zoe zal hy behouden bliuen. ¶ Sinte Bernardus seyt Meerre is godes goedertierenheyt dan enighe boesheyt
§ Sinte Augustinus seyt Onse lieue here mach meer ontfermen dan een mensce zundighen mach Iae al wist een mensche te voren dat hi verdoemt zoude zijn. nochtans soe en zal hy niet wanhopen mer altoes betrouwende zijn in die ontfermherticheyt godes Want ouermits volcomen gheloue ende vaste betrouwen machmen god zijn hemelrijcke afdwinghen. ¶ Hier af staet gescreuen Dat Iudas veel meer zundichde omme dat hi in wanhope viel ende verhenck hem seluen. dan dat hi xpristum verraden ende vercoft hadde Want al hadde hi xpristum vercoft nochtans hadde hi van gode genade begheert. god en soude hem zijne milde ontfermherticheyt niet gheweyghert hebben
Auteursrechtvrij
