Ars moriendi

§ Die verdoemde moeten ten oerdel comen teghens horen wille

ITem het sal den verdoemden soe groete pine wesen dat si ten ordel comen moeten ende dat strenghe aensicht gods beschouwen in also groter wreetheyt dat si lieuer inder hellen bliuen solden ende mitten duuelen ommegaen dan si ten ordel comen moeten ende dat strenghe aensichte ons heren ihesu xpristi anschouwen moeten in alsoe grote wreetheyt ende verueernisse. Mer dat en baet hem niet. si moeten daer comen ende ontfanghen loen nae horen wercken. Op dat si verscheyden werden van alle wtuercoren heylighen. Ende op dat zij sien dat verueerlicke strenghe aensicht ihesu xpristi tot hoer ewighe verdoemenisse.

¶ Nu mocht yemant vraeghen waer omme dat die verdoemde sielen ten oerdel moeten comen ende wiese daer toe sal dwinghen. want die duuelen sullen dat ordel wel soe seer onturuchten als dye verdoemde menschen. ¶ Hier op is te

[fol. 26v]

antworden. Die duuel en salse daer niet toe dwinghen Want hi moet teghen sinen danck oeck ten ordel comen. Mer god die heere ihesus xpristus salse daer brenghen ouermits zijn strenghe rechtueerdicheyt Want god mach die duuelen dwinghen ten ordel te comen.

¶ Och lieue mensche laet v dit ter herten gaen. ende hebbet ontfermherticheyt mit v zeluen ende doet doechdelijcke werken alsoe langhe als du hier die tijt hebste Want die tijt wordt di haest ondergaen. die doot is snel ende comt alte hantes Iae huden ghezont morghen doot. Ofte nu ghezont binnen een vre doot

Ghedenket sonde opholdinghe dattu nu verdienen mogheste alzoe langhe alstu leueste. ende daestu ouermits dijn verdienste ewelick ansien mogheste dat genoechlijcke aenschijn gods daer hem alle die heylighe engelen in verblijden daer hem alle dat hemelsche heer in vervrouwet. En wilt vmmer niet traech wezen dit costelijcke pant te verdienen mer vlitich ende neerstich bereyt v daer toe dattu dat mogheste besitten in ontsprekeliker blijscappen ende ghenoechten. op datstu mitten duuel ende mit allen quaden menschen niet bescaemt en staet voer dat ordel godes