Ars moriendi

§ wat groter pine dattet den verdoemeden sielen wesen sal dat aensicht godes nummermeer in vrouden te sien.

Men sal hier voert weten ende verstaen die anderde pine der verdoemder sielen ende des duuels. Welcke is dese dat si dat anschijn xpristi nummermeer en moghen aenschouwen. Ende dit is hem die alre meeste pijn. Iae si zullen dat aensichte gods te ionxten daghe aenschouwen Als die strenghe richter sentencie sal gheuen ouer de ghebenedide ende ouer die vermaledide. Mer o wee des schouwens Want dat zal hem wesen tot haer ewighe verdoemenisse. Mer het sal den ghebenediden die alre meeste vroude ende blijscappe wesen dat genoechlike aensichte xpristi ihesu aen te sien in ontsprekeliker vrouden ende blijscappen. ende daer omme salt den vermalediden dye alre meeste pine wesen aen te schouwen

[fol. 26r]

Als hi tot hem spreken sal. Discedite a me maledicti in ignem eternam. dat is te seggen. Gaet van mi ghi vermaledide in dat ewighe vuer dat den duuel ende sinen ghesellen bereyt is van aenbeginne der werelt. Ghelikerwijs als geschreuen staet in dat heylighe euangelio Die verdoemde sullen confuus ende bescaemt staen voer dat aensicht ons heren ihesu xpristi. Si en sullen niet een woert weten te antwoerden voerden richtstoel. Mer zij sullen verordelt worden totter ewigher verdoemenissen ¶ Hier af so sprect die heylighe apostel sinte paulus seggende aldus. Hoer vroude sal worden verwandelt in droefenisse ende die glorie sal ghemenghet wesen mit ontspreekelike bitterheyt. Want zy moeten ewelick ende altoes in allen pinen bliuen ende nummermeer en sullen zij sonder pijne wezen noch nummermeer en sal hoer pine vermindert wesen. ende dat aensichte godes en sullen si nummermeer in vrouden noch in blijscappen aenschouwen. Want al is dat sake dat de verdoemde onsen here ten ordel zullen sien. si en zullen nochtans zijn godheyt niet sien. Si en sullen die godheyt des vaders niet sien moghen noch die godheyt des heylighen gheestes Mer si sullen alleen aenschouwen den soen godes die dat menschelijke geslachte verlost heuet mit een ontellick gheselscap der heylighen ende der engelen. ghelikerwijs als een almachtich god ende een richter ouer die leuendighen ende doden ¶ Die sentencie ende dat ordele dat die verdoemde van hem horen sullen sal soe wreet wesen dat gheen mensce dat bedencken en mach hoe strenge dattet den verdoemden sal wesen te horen. ¶ Ende die sentencie die hy sinen vutuercoren vrenden toe spreken sal die sal alsoe ghenoechlijcke zoete wesen sinen wtuercoren vrienden te horen dat geen mensche en soude die vroude ende die blijscappen moghen bedencken.